Azərbaycan xalqının tarixində elə günlər var ki, onların mənası yalnız keçmişlə deyil, həm də bu günümüz və gələcəyimizlə ölçülür. 18 Oktyabr – Dövlət Müstəqilliyinin Bərpası Günü məhz belə əlamətdar tarixlərdəndir. Bu gün xalqımızın azadlıq iradəsini, milli kimliyini, dövlətçilik ənənələrinə bağlılığını və öz taleyini müstəqil müəyyənləşdirmək əzmini təcəssüm etdirir.
1991-ci il oktyabrın 18-də qəbul edilmiş Dövlət Müstəqilliyi haqqında Konstitusiya Aktı Azərbaycanın müasir tarixində yeni bir səhifə açaraq milli dövlətçiliyimizin yenidən dirçəlişinə hüquqi əsas yaratdı.
Azərbaycanın müstəqil dövlət kimi möhkəmlənməsində Ulu Öndər Heydər Əliyevin siyasi fəaliyyəti mühüm mərhələ təşkil edir. 1993-cü ildə onun siyasi hakimiyyətə qayıdışından sonra ölkədə sabitliyin təmin edilməsi, dövlət institutlarının gücləndirilməsi və iqtisadi inkişafın əsaslarının yaradılması istiqamətində mühüm addımlar atıldı. Dövlətçilik düşüncəsinin mərkəzində Azərbaycanın müstəqilliyinin qorunması, milli maraqların müdafiəsi və ölkənin gələcək inkişafının təmin edilməsi dayanırdı. 1994-cü ildə imzalanan “Əsrin müqaviləsi” Azərbaycanın enerji strategiyasının formalaşmasında və beynəlxalq iqtisadi əlaqələrinin genişlənməsində əhəmiyyətli rol oynadı. 1995-ci ildə müstəqil Azərbaycanın ilk Konstitusiyasının qəbul edilməsi isə hüquqi dövlət quruculuğunun əsaslarını möhkəmləndirdi. Heydər Əliyevin dövlətçilik irsi müstəqilliyin qorunması, milli birliyin möhkəmləndirilməsi və Azərbaycanın beynəlxalq münasibətlər sistemində mövqeyinin gücləndirilməsi kimi istiqamətlərlə səciyyələnir. Bu irsin əhəmiyyəti dövlət müstəqilliyinin yalnız bir tarixi hadisə deyil, davamlı siyasi, iqtisadi və mənəvi məsuliyyət olduğunu anlamaqda özünü göstərir.
Dövlət müstəqilliyinin möhkəm dayaqlarından biri milli kimliyin qorunmasıdır. Azərbaycan dili, zəngin ədəbi irsimiz, adət-ənənələrimiz və mədəniyyətimiz xalqımızın tarixi yaddaşını yaşadan əsas dəyərlərdəndir. Bu dəyərlərin qorunması və inkişaf etdirilməsi dövlətçilik şüurunun möhkəmlənməsinə, milli birliyin güclənməsinə və gələcək nəsillərin öz köklərinə bağlı yetişməsinə xidmət edir. 18 Oktyabrın tarixi əhəmiyyəti keçmişdə qazanılmış nailiyyətləri xatırlatmaqla bitmir. Bu gün həm də müstəqilliyin qorunması, dövlətçiliyin inkişafı və milli maraqların gələcək nəsillərə ötürülməsi məsuliyyətini gündəmə gətirir. Hər bir vətəndaşın öz ölkəsinin inkişafına töhfə verməsi, qanunlara hörmətlə yanaşması, milli dəyərləri qoruması və ictimai məsuliyyət nümayiş etdirməsi müstəqil dövlətin güclənməsində mühüm rol oynayır. Azərbaycanın müstəqillik tarixi xalqın iradəsinin, dövlətçilik təcrübəsinin və gələcəyə inamının tarixidir. Bu tarixin hər mərhələsi göstərir ki, milli dövlətçiliyin möhkəmliyi xalqın birliyindən, dövlət institutlarının gücündən və ölkənin qarşısına qoyduğu məqsədlərə ardıcıl şəkildə yönəlməsindən asılıdır.
Azərbaycan Dövlət Pedaqoji Universitetinin müəllimi, gənc alim
Gülöyşə Azadqızı