ABŞ-nin paytaxtı Vaşinqtonda 24-cü ənənəvi Türk festivalı keçirilib.
“Tehsil365” AZƏRTAC -a istinadən xəbər verir ki, festival münasibətilə şəhərin mərkəzində yerləşən Pensilvaniya prospektinin bir hissəsi avtomobillərin hərəkətinə bağlanıb. Minlərlə insanın qatıldığı tədbirdə Türkiyə, Azərbaycan və digər türkdilli xalqların milli mədəniyyəti, musiqisi, rəqsləri və mətbəx nümunələri nümayiş etdirilib.
Bu il festivalda Azərbaycan öz mədəniyyəti ilə geniş şəkildə təmsil olunub. Vaşinqton və ətraf ştatlarda yaşayan azərbaycanlı musiqiçilərin çıxışları tədbir iştirakçılarına əsl bayram əhvali-ruhiyyəsi yaşadıb.
Azərbaycan Evinin təqdim etdiyi konsert proqramında müğənnilər Günay Quliyeva, Zaur Cəlil və Bəhruz Fərruxi, eləcə də DJ Bazaur çıxış ediblər. Azərbaycan musiqisinin sədaları altında təkcə soydaşlarımız deyil, xarici qonaqlar da rəqs ediblər.
Konsert proqramında iştirak edən azərbaycanlı müğənni Zaur Cəlil Vaşinqtonun mərkəzində Azərbaycan musiqisini səsləndirməkdən məmnunluq duyduğunu bildirib. O qeyd edib ki, Azərbaycanın Müstəqilliyinin Bərpası Günündə səhnəyə çıxaraq ölkəmizi təmsil etmək onun üçün xüsusi əhəmiyyət daşıyır.
Festivalda Azərbaycan mətbəxi də ziyarətçilərin marağına səbəb olub. Artıq neçə ildir ki, Azərbaycan təamları tədbirin ən çox diqqətçəkən guşələrindən birinə çevrilib. Milli yeməklərimizi dadmaq üçün stendlərə yaxınlaşanlar arasında Azərbaycan haqqında ilk dəfə eşidənlərlə yanaşı, mətbəximizlə əvvəldən tanış olanlar da olub. Ziyarətçilərə milli təamlarla yanaşı, ölkəmizin tarixi, mədəniyyəti və adət-ənənələri barədə məlumat verilib.
Festivalda Azərbaycan yalnız milli musiqisi və mətbəxi ilə deyil, Amerikada yaşayan soydaşlarımızın yaradıcılıq nümunələri ilə də təmsil olunub.
Onlardan biri də Nigar Mustafayevadır. Daun sindromlu Nigar artıq beşinci ildir ki, Türk festivalında öz əl işlərini nümayiş etdirir. Təbii daşlardan hazırladığı qolbaq və boyunbağılar ziyarətçilərə təqdim olunub. O, əl işlərində Azərbaycan Bayrağının rənglərindən də istifadə edir.
Nigarın atası bildirib ki, qızının hazırladığı bəzək əşyaları Amerikada tanınır və sevilir. Onun sözlərinə görə, Nigar böyük həvəslə hazırladığı əl işlərini festival iştirakçılarına təqdim edir. Ailəsi də bu fəaliyyətində ona dəstək göstərir.
Atası qeyd edib ki, festivalda iştirak onlar üçün yalnız Nigarın yaradıcılığını nümayiş etdirmək deyil, həm də Azərbaycanı təmsil etmək imkanıdır. Onlar ziyarətçilərə ölkəmizin tarixi, mədəniyyəti və milli dəyərləri haqqında da məlumat verirlər.
Beləliklə, Azərbaycan musiqisinin sədaları, milli təamlarımız və soydaşlarımızın yaradıcılıq nümunələri Vaşinqtonun mərkəzində əsl Azərbaycan ab-havası yaradıb. Festival milli mədəniyyətimizin Amerika ictimaiyyətinə tanıdılması üçün növbəti fürsət olub.