Bu gün xaricdə təhsil üzrə Dövlət Proqramı məzunları üçün karyera sərgisi keçirilir.
Həmin məzunlardan biri də İsmayıl Məsimovdur.
“Tehsil365” xəbər verir ki, “AzEdu.az” bu münasibətlə İsmayıl Məsimovla həmsöhbət olub və onun xaricdə təhsil təcrübəsi ilə bağlı fikirlərini öyrənib.
“Hazırda Advanced Control and Systems Engineering ixtisası üzrə vakansiyalarla maraqlanmaq üçün Dövlət Proqramının təşkil etdiyi karyera sərgisində iştirak edirəm. Bakalavr təhsilimi Bakı Ali Neft Məktəbində Proseslərin avtomatlaşdırılması ixtisası üzrə almışam. 2020-ci ildə 688 balla həmin ixtisasa qəbul olunmuşam.
Bakalavr təhsilimi başa vurduqdan sonra xaricdə təhsil imkanları ilə maraqlandım. Ən əlçatan və münasib imkan kimi Dövlət Proqramı qarşıma çıxdı və proqrama müraciət etdim. Proqramın dəstəyi ilə İngiltərənin Mançester Universitetində Advanced Control and Systems Engineering mühəndisliyi ixtisası üzrə birillik magistratura təhsilimi başa vurdum. Hazırda ölkəyə yeni qayıtmışam.
Dövlət Proqramının yaratdığı imkanlar sayəsində magistratura təhsilimə uyğunlaşmağım çox rahat oldu. Proqram həm maddi dəstək göstərdi, həm də digər tələbələrlə əlaqələr qurmağıma, yəni şəbəkələşməyə (networking) kömək etdi. Bu da həm dərslərə, həm də yeni mühitə uyğunlaşmağımı asanlaşdırdı. Çünki Azərbaycandan Dövlət Proqramını qazanan digər tələbələrlə əvvəlcədən ünsiyyətim var idi. Hətta onlardan biri ilə orada ortaq dostlarımız da oldu. Təhsil aldığım ixtisas üzrə universitetdə bir neçə azərbaycanlı tələbə də var idi. Bütün bu imkanlar sayəsində təhsilimi rahat şəkildə başa vurdum.
Gələcək karyeramı Azərbaycanda davam etdirmək və burada mövcud olan iş imkanlarını dəyərləndirmək istəyirəm. İlk növbədə mühəndislik sahəsində, xüsusilə də daha çox vakansiyanın olduğu neft-qaz sənayesində işləməyi düşünürəm. Hazırda bu sahədə həm yerli şirkətlərin, o cümlədən SOCAR-ın, həm də beynəlxalq şirkətlərin, məsələn, SLB və BP-nin vakansiyaları ilə maraqlanıram”.