“Timepavilion” keçmişə səyahət konsepsiyası əsasında yaradılmış Azərbaycanın ilk immersiv muzeyidir. Layihə üzərində komandamızla birlikdə iki ilə yaxın çalışmışıq. Qarşılaşdığımız əsas çətinliklərdən biri 1919-cu ilin Bakısını tarixi reallıqlara uyğun şəkildə canlandırmaq olub. Bunun üçün həmin dövrə aid tarixi faktları, fotoşəkilləri və digər arxiv materiallarını ətraflı araşdırmış, şəhərin küçələrini, binalarını və ümumi ab-havasını mümkün qədər dəqiq əks etdirməyə çalışmışıq.
“Tehsil365” xəbər verir ki, bunu jurnalistlərə açıqlamasında muzeyin təsisçisi Vahid İbrahimov bildirib.
Onun sözlərinə görə, layihənin ilkin konsepsiyası daha da genişləndirilərək yalnız virtual reallıq (VR) texnologiyaları ilə məhdudlaşdırılmayıb.
“İçərişəhər” Dövlət Tarix-Memarlıq Qoruğu İdarəsinin dəstəyi ilə layihənin əhatə dairəsini genişləndirmişik. Muzeyin digər otaqlarında ziyarətçilərə həmin dövrün mətbuat tarixi, neft sənayesi və şəhərin ictimai həyatı haqqında da məlumatlar təqdim olunur. Məqsədimiz 1919-cu ilin Bakısını bütün xüsusiyyətləri ilə ziyarətçilərə tanıtmaqdır”, – deyə o vurğulayıb.
V.İbrahimov qeyd edib ki, hazırda istifadəyə verilən muzey layihənin yalnız ilk mərhələsidir. Növbəti pavilyonun açılışı isə gələn ilin ortalarına planlaşdırılır.
“Yeni pavilyon eyni ərazidə, mövcud muzeyin aşağı mərtəbəsində yerləşəcək və hazırkı ekspozisiyanın davamı olacaq. Birinci mərhələdə ziyarətçilərə 1919-cu ilin Bakısı haqqında ümumi tarixi məlumatlar təqdim edilir. Növbəti pavilyonda isə onlar sanki həmin dövrün şəhər həyatının birbaşa iştirakçısına çevriləcəklər. Ziyarətçilər otaqdan-otağa keçərək o dövrdə Bakı sakinlərinin gündəlik həyatını, yaşayış tərzini və şəhər mühitini daha yaxından tanımaq imkanı əldə edəcəklər. Əsas məqsədimiz insanlara tarixi yalnız izləmək deyil, həm də onu interaktiv şəkildə yaşamaq imkanı yaratmaqdır”, – deyə muzeyin təsisçisi əlavə edib.