Virtual reallıq texnologiyalarına əsaslanan “Timepavilion – Bakı 1919” layihəsi ziyarətçilərə 1919-cu ilin Bakısına virtual səyahət etmək, həmin dövrün tarixi mühitini və ab-havasını yaxından hiss etmək imkanı yaradacaq.
“Tehsil365” xəbər verir ki, bunu jurnalistlərə açıqlamasında “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud bildirib.
Onun sözlərinə görə, yeni muzey Qoruq İdarəsinin həyata keçirdiyi “Ağıllı qoruq” konsepsiyasının tərkib hissəsidir. Layihənin əsas məqsədi müasir texnologiyaların imkanlarından istifadə etməklə tarixi irsi innovativ üsullarla təqdim etmək, ziyarətçilərə fərqli və yaddaqalan təəssüratlar yaşatmaqdır.
Muzeyə giriş biletlərinin qiymətləri ilə bağlı məsələyə də toxunan İdarə Heyətinin sədri İçərişəhərdə bilet siyasətinin təkmilləşdirilməsi istiqamətində bir sıra yeniliklərin həyata keçirildiyini diqqətə çatdırıb.
“Artıq bir neçə bilet paketi yenidən işlənib. Bildiyiniz kimi, Azərbaycan vətəndaşları üçün xarici turistlərlə müqayisədə güzəştli bilet qiymətləri tətbiq olunur. Bu, beynəlxalq təcrübədə geniş yayılmış yanaşmadır və İçərişəhərdə də tətbiq edilir”, - deyə o qeyd edib.
İçərişəhər sakinləri üçün nəzərdə tutulan güzəştlərdən bəhs edən Rüfət Mahmud bildirib ki, Qoruq İdarəsi tərəfindən yerli sakinlərin mədəni həyata daha fəal cəlb olunması istiqamətində müxtəlif təşəbbüslər həyata keçirilir.
“İçərişəhər sakinləri üçün nəzərdə tutduğumuz proqram kifayət qədər genişdir. İl ərzində onlar üçün müxtəlif mədəni və maarifləndirici tədbirlər təşkil olunur. Bununla yanaşı, sakinlərin muzeyləri ödənişsiz ziyarət edə bilmələri üçün xüsusi günlərin təşkili də planlaşdırılır”, – deyə o əlavə edib.