Azərbaycan Dövlət Neft və Sənaye Universitetinin (ADNSU) nümayəndələri Qazaxıstana səfər çərçivəsində akademik mobillik proqramı üzrə Satbayev Universitetində təhsil alan səkkiz ADNSU tələbəsi ilə görüşüblər.
“Tehsil365” xəbər verir ki, ADNSU-nun üçüncü kursunda təhsil alan tələbələr proqram çərçivəsində bir semestr ərzində Satbayev Universitetində təhsillərini davam etdirəcək, bilik və praktik təcrübələrini genişləndirəcəklər. Mobillik müddəti başa çatdıqdan sonra onlar ADNSU-ya qayıdaraq təhsillərini doğma universitetlərində davam etdirəcəklər.
Görüşdə ADNSU-nun Əcnəbi tələbələrlə iş şöbəsinin müdiri Səbinə Əliyeva, şöbənin baş mütəxəssisi İlhamə Osmanova və İctimaiyyətlə əlaqələr və marketinq şöbəsinin müdiri Xülya Sabirli iştirak ediblər.
Akademik mobillik proqramı tələbələrin fərqli tədris mühiti ilə tanış olmasına, ixtisasları üzrə yeni yanaşmaları mənimsəməsinə və nəzəri biliklərini praktik təcrübə ilə zənginləşdirməsinə xidmət edir. Xarici universitetdə bir semestrlik təhsil həmçinin onların müstəqil öyrənmə, yeni mühitə uyğunlaşma və müxtəlif mədəniyyətlərdən olan insanlarla ünsiyyət bacarıqlarının inkişafı üçün imkan yaradır.
Proqram çərçivəsində qazanılacaq təcrübənin tələbələrin sonrakı təhsilinə və peşəkar inkişafına töhfə verməsi gözlənilir.
Bu cür mobillik imkanları ADNSU-nun beynəlxalq akademik əlaqələrinin inkişafı və tələbələr üçün təhsil imkanlarının genişləndirilməsi baxımından da əhəmiyyət daşıyır.