Azərbaycan Dövlət Pedaqoji Universitetinin (ADPU) Quba filialının direktoru professor Yusif Alıyev Özbəkistanda işgüzar səfərdədir.
“Tehsil365” xəbər verir ki, Səfər çərçivəsində professor Yusif Alıyev Asiya Texnologiyalar Universitetində professor-müəllim heyəti və magistrantlar üçün “Materialşünaslıq üzrə tədqiqat məqaləsinin yazılma metodologiyası” mövzusunda akademik seminar keçirib. Seminarda elmi tədqiqatın planlaşdırılması, tədqiqat sualının müəyyənləşdirilməsi, elmi yeniliyin əsaslandırılması, eksperimentlərin təşkili və nəticələrin akademik məqalədə təqdim olunması məsələləri diqqətə çatdırılıb. Materialşünaslıq sahəsindən nümunələr əsasında tədqiqat nəticələrinin düzgün təhlili, ölçmə məlumatlarının etibarlılığının qiymətləndirilməsi və elmi məqalələrin hazırlanması prinsipləri izah edilib. Professor Yusif Alıyev elmi məqalənin keyfiyyətinin yalnız aparılan ölçmələrin sayı ilə deyil, əldə olunan nəticələrin tədqiqat sualına əsaslandırılmış cavab verməsi və elmi yeniliyin aydın şəkildə təqdim olunması ilə müəyyənləşdiyini vurğulayıb. O, həmçinin elmi ədəbiyyatın təhlili, hipotezlərin yoxlanılması, eksperimental nəticələrin şərhi və tədqiqatın məhdudiyyətlərinin düzgün göstərilməsinin əhəmiyyətindən danışıb. Təqdimat zamanı materialların struktur və xassələrinin öyrənilməsində istifadə olunan müasir tədqiqat üsulları, elmi nəticələrin şəkil və cədvəllərlə təqdim edilməsi, eləcə də tədqiqatın təkrarlana bilməsini təmin edən məlumatların məqalədə əks olunması məsələlərinə toxunulub. İştirakçılarla elmi məqalələrin hazırlanması və beynəlxalq elmi jurnalların tələblərinə uyğunlaşdırılması barədə fikir mübadiləsi aparılıb. Seminar sual-cavab və müzakirələrlə davam edib.
Oktyabrın 15-də professor Yusif Alıyevin rəhbərlik etdiyi nümayəndə heyəti Nizami Gəncəvi adına Özbəkistan Milli Pedaqogika Universitetində də olub. Universitetin beynəlxalq əlaqələr üzrə prorektoru, doktor Dilnoza Holmurodova ilə keçirilən görüşdə ali təhsil müəssisələri arasında elmi-pedaqoji əlaqələrin inkişafı, birgə tədqiqatların aparılması, elmi konfrans və seminarların təşkili, professor-müəllim heyəti və tələbələr üçün akademik mübadilə imkanları müzakirə edilib.
Görüşdə ADPU-nun Quba filialı ilə Özbəkistan Milli Pedaqogika Universiteti arasında qarşılıqlı təcrübə mübadiləsinin genişləndirilməsi və gələcək əməkdaşlıq istiqamətləri ətrafında fikir mübadiləsi aparılıb. Professor Yusif Alıyev Quba filialının birgə elmi və təhsil təşəbbüslərinin həyata keçirilməsində maraqlı olduğunu bildirib.
Görüşdə, həmçinin “Özbəkistan–Azərbaycan” Dostluq Cəmiyyətinin icraçı direktoru, universitetin professoru Erkin Nuriddinov, ADPU-nun Quba filialının tədris və elmi işlər üzrə direktor müavini p.ü.f.d. Pərvanə Rzayeva və Ümumi fənlər və təbiət elmləri kafedrasının müdiri p.ü.f.d. Lətifə Cəlilova iştirak ediblər.
İşgüzar səfər Azərbaycan və Özbəkistanın ali təhsil müəssisələri arasında elmi əməkdaşlığın genişləndirilməsi, akademik təcrübə mübadiləsinin inkişafı və yeni birgə təşəbbüslərin müzakirəsi baxımından əhəmiyyət daşıyır.