“Azərbaycanda dövlət qurumlarının əməkdaşlarının süni intellekt alətlərinə daxil etdikləri məlumatlara nəzarət məsələsi gündəmə gətirilib”.
“Tehsil365” xəbər verir ki, bu barədə Dövlət Xüsusi Rabitə və İnformasiya Təhlükəsizliyi Xidmətinin idarə rəisi, general-leytenant Nadir Novruzov Bakıda keçirilən dövlət qurumlarının informasiya təhlükəsizliyi rəhbərlərinin VIII Zirvə Toplantısında danışıb.
Onun sözlərinə görə, dövlət qurumlarında süni intellekt alətlərindən istifadə olunur, lakin bu alətlərə daxil edilən məlumatların izlənilməsi və nəzarətdə saxlanılması ilə bağlı problemlər mövcuddur.
Nadir Novruzov bildirib ki, səs məlumatlarının xarici süni intellekt platformalarına ötürülməsi kimi hallar da bəzən diqqətdən kənarda qalır. O, bəzi alətlərə giriş məhdudlaşdırılsa belə, əməkdaşların başqa platformalardan istifadə edə biləcəyini qeyd edib. Nəzarətdən kənarda qalan bu cür alətlər “kölgə süni intellekti” (shadow AI) adlandırılır.
Toplantıda süni intellektin dövlət idarəçiliyində tətbiqi, kibertəhlükələr, rəqəmsal infrastrukturun qorunması və informasiya təhlükəsizliyi risklərinin idarə edilməsi məsələlərinin müzakirəsi nəzərdə tutulub.