Fransa-Azərbaycan Universitetində (UFAZ) Qarabağ Universitetinin Azyx Arxeoloji Tədqiqat və Analiz Laboratoriyaları Mərkəzinin rəhbəri, Azərbaycan Milli Elmlər Akademiyasının tədqiqatçısı Əjdər Babazadə ilə görüş keçirilib.
“Tehsil365” xəbər verir ki, bu barədə UFAZ öz rəsmi saytında məlumat paylaşıb.
Bildirilib ki, UFAZ-ın baş katibi Martin Qodonun da iştirak etdiyi görüşdə arxeologiya, geologiya elmləri və analitik kimya sahələrini birləşdirən multidissiplinar tədqiqatlar üzrə əməkdaşlıq imkanları müzakirə olunub.
Müzakirələr zamanı UFAZ-ın geologiya elmləri və analitik kimya sahələrindəki təcrübəsinin arxeoloji tədqiqatlarla birləşdirilməsinin yeni elmi imkanlar yarada biləcəyi vurğulanıb. Əməkdaşlığın potensial istiqamətləri sırasında arxeoloji materialların tərkibinin və mənşəyinin müəyyənləşdirilməsi, keçmiş dövrlərin geoloji və ekoloji şəraitinin öyrənilməsi, eləcə də arxeoloji ərazilərin tədqiqində geofiziki metodlardan və məsafədən zondlama texnologiyalarından istifadə məsələləri yer alıb.
Bununla yanaşı, qədim üzvi qalıqların molekulyar təhlili vasitəsilə keçmiş cəmiyyətlərin istifadə etdiyi materiallar, tətbiq etdiyi texnologiyalar və insan fəaliyyəti haqqında məlumat əldə etmək imkanları nəzərdən keçirilib.
Qeyd olunub ki, bu əməkdaşlıq birgə elmi tədqiqatlarla yanaşı, yerli mütəxəssis potensialının inkişafına, laboratoriya və analitik imkanların gücləndirilməsinə, eləcə də elmi bilik və təcrübə mübadiləsinin təşviqinə töhfə verə bilər.
Görüş mümkün əməkdaşlıq istiqamətlərinin müəyyənləşdirilməsi və birgə tədqiqat layihələrinin hazırlanması istiqamətində ilkin addım kimi qiymətləndirilib.