“Oktyabrın 22-də Bakıda “Rəqəmsal Maliyyə Ekosistemi: İdarəetmədə Yeni Mərhələ” adlı konfrans keçiriləcək. Tədbirdə dövlət maliyyəsinin rəqəmsallaşdırılması, maliyyə məlumatlarının idarə olunması və rəqəmsal əməliyyatların təhlükəsizliyinin təmin edilməsi məsələləri müzakirə olunacaq”.
“Tehsil365” xəbər verir ki, konfrans Azərbaycan Maliyyə Nazirliyinin dəstəyi ilə, nazirliyin İctimai Şurasının təşkilatçılığı və Azərbaycan Peşəkar Maliyyə Menecerləri Assosiasiyasının tərəfdaşlığı ilə keçiriləcək.
Tədbirdə dövlət qurumlarının, özəl sektorun, vətəndaş cəmiyyəti təşkilatlarının nümayəndələrinin və peşəkar mühasiblərin iştirakı gözlənilir.
Konfrans çərçivəsində iki panel müzakirəsinin təşkili nəzərdə tutulur. Birinci paneldə dövlət maliyyəsinin rəqəmsallaşdırılması, müxtəlif informasiya sistemlərinin inteqrasiyası və yeni idarəetmə modelinə keçid məsələləri diqqət mərkəzində olacaq.
İkinci paneldə isə dövlət maliyyəsi sahəsində məlumatların idarə olunmasının dayanıqlılığı, maliyyə əməliyyatlarının təhlükəsizliyi və məlumatların etibarlı qorunması müzakirə ediləcək.
Tədbirdə həmçinin dövlət xərclərinin səmərəliliyinin qiymətləndirilməsində məlumatlara əsaslanan təhlil üsullarının tətbiqi, dövlət satınalmalarında məlumat bazalarının təkmilləşdirilməsi və maliyyə əməliyyatlarında risklərin erkən müəyyənləşdirilməsi məsələlərinə toxunulacaq.