“Beynəlxalq Maliyyə Korporasiyası (IFC) Azərbaycanda dəniz suyunun duzsuzlaşdırılması, tullantı sularının təmizlənməsi və bərpa olunan enerji sahələrində əməkdaşlıq imkanlarını nəzərdən keçirir”.
“Tehsil365” xəbər verir ki, bu barədə IFC-nin Qərbi Balkanlar və Cənubi Qafqaz üzrə regional direktoru Vibke Şlemör “Trend”ə müsahibəsində bildirib.
Onun sözlərinə görə, özəl sektorun inkişafı Azərbaycanın iqtisadiyyatının şaxələndirilməsi, yeni iş yerlərinin yaradılması və rəqabət qabiliyyətinin artırılması baxımından mühüm əhəmiyyət daşıyır. Bu istiqamətdə beynəlxalq tərəfdaşların dəstəyi və özəl investisiyaların cəlb edilməsi vacib rol oynayır.
IFC su təsərrüfatı sahəsində, xüsusilə dəniz suyunun duzsuzlaşdırılması və tullantı sularının təmizlənməsi istiqamətlərində yeni əməkdaşlıq imkanlarını araşdırır. Bu sahələrdə özəl sektorun maliyyə və texniki imkanlarından istifadə infrastrukturun inkişafına töhfə verə bilər.
Bundan əlavə, korporasiya Azərbaycanda bərpa olunan enerji, kənd təsərrüfatı, nəqliyyat infrastrukturu və rəqəmsal bağlantı sahələrində özəl investisiyaların təşviqini dəstəkləyir.
IFC nümayəndəsinin sözlərinə görə, məqsəd yalnız maliyyə vəsaiti ayırmaq deyil, həm də özəl investorların qarşılaşdığı riskləri və maneələri azaltmaq, yeni investisiya imkanları yaratmaqdır.
Qeyd edək ki, Beynəlxalq Maliyyə Korporasiyası Dünya Bankı Qrupuna daxildir və inkişaf etməkdə olan ölkələrdə özəl sektorun inkişafını dəstəkləyir.