“2026–2027-ci tədris ilində Azərbaycan Dövlət İqtisad Universitetinə (UNEC) qəbul olunan əcnəbi tələbələrin sayı 431 nəfərə çatıb. Bu, universitetin tarixində əcnəbi tələbə qəbulu üzrə ən yüksək göstəricidir”.
“Tehsil365” xəbər verir ki, UNEC-də təhsil almaq üçün müraciət edən əcnəbilərin sayı ötən illə müqayisədə 161,3 faiz artıb. Müraciət edənlərin 60,2 faizi universitetə qəbul olunub.
Artım həm bakalavriat, həm də magistratura səviyyələrində qeydə alınıb. Belə ki, bakalavriat üzrə əcnəbi tələbə qəbulu 51,7 faiz, magistratura üzrə isə 92,3 faiz artıb.
Universitetin beynəlxalq tələbə coğrafiyası da genişlənib. Ötən illə müqayisədə UNEC-də təhsil alan əcnəbi tələbələrin təmsil olunduğu ölkələrin sayı 25 faiz artaraq 30-a yüksəlib.
Qəbul olunan tələbələrin 50,3 faizini qızlar, 49,7 faizini isə oğlanlar təşkil edir. Əcnəbi tələbələr universitetdə Azərbaycan, türk, ingilis və rus dillərində təhsil ala biləcəklər.
İxtisaslar üzrə ən yüksək artım MBA proqramında müşahidə olunub. Bu proqram üzrə qəbul 2,8 dəfə artıb. Maliyyə ixtisasına qəbul 2,3 dəfə, Biznesin idarə edilməsinə qəbul 2,1 dəfə, İnformasiya təhlükəsizliyi ixtisasına qəbul isə 1,7 dəfə yüksəlib.
Qeyd edək ki, göstəricilər UNEC-in beynəlxalq tələbələr üçün cəlbediciliyinin artdığını və universitetin müxtəlif ölkələrdən olan tələbələr üçün təhsil imkanlarını genişləndirdiyini göstərir.