“Bu il Bakı Beynəlxalq Kitab Sərgisində iştirakçıların sayı əvvəlki illərlə müqayisədə ən yüksək həddə çatıb. Sərgidə 148 yerli nəşriyyat və təşkilat öz stendi ilə təmsil olunur. Beynəlxalq iştirakçılıqda da artım müşahidə edilir. Belə ki, 32 ölkədən 59 nəşriyyat və təşkilat sərgiyə qatılıb”.
“Tehsil365” xəbər verir ki, bunu XII Bakı Beynəlxalq Kitab Sərgisi çərçivəsində jurnalistlərə açıqlamasında mədəniyyət nazirinin müavini Fərid Cəfərov bildirib.
Onun sözlərinə görə, Mədəniyyət Nazirliyinin təşkilatçılığı və Azərbaycan Dövlət Neft Şirkətinin (SOCAR) dəstəyi ilə keçirilən sərgidə dövlət qurumları, ali təhsil müəssisələri və xarici ölkələrin Azərbaycandakı səfirlikləri də öz nəşrlərini xüsusi stendlərdə təqdim edirlər.
F.Cəfərov bildirib ki, yeddi gün davam edəcək sərgi çərçivəsində 300-dən çox tədbirin keçirilməsi nəzərdə tutulur:
“Tədbirlər çərçivəsində yerli və xarici yazıçılarla görüşlər, kitab təqdimatları, ədəbiyyatın təbliğinə həsr olunmuş yerli və beynəlxalq konfranslar təşkil ediləcək. Bununla yanaşı, nəşriyyatlar arasında işgüzar görüşlərin keçirilməsi üçün də xüsusi məkan ayrılıb”.
Nazir müavini qeyd edib ki, sərginin fəxri yazarları Xalq şairi Sabir Rüstəmxanlı və uşaq yazıçısı Reyhan Yusifqızıdır. Həmçinin müxtəlif ölkələrdən tanınmış yazıçıların dəvət olunması nəzərdə tutulub.
F.Cəfərov builki sərginin əsas mövzusunun uşaqların mütaliəyə marağının artırılması olduğunu vurğulayıb:
“Bu il kitab sərgisi uşaqlara həsr olunub. Sərginin əsas ideyası “Həyat ekrandan böyükdür” şüarı ilə ifadə olunur. Əsas məqsəd uşaqları kitaba daha da yaxınlaşdırmaq, ədəbiyyatımızın gənc nəsil arasında daha geniş yayılmasına və təbliğinə töhfə verməkdir. Bunun üçün sərgi ərazisində uşaqlar üçün xüsusi zonalar da yaradılıb”.
Qeyd edək ki, XII Bakı Beynəlxalq Kitab Sərgisi oktyabrın 21-dən 27-dək Bakı Ekspo Mərkəzində keçirilir.