Kitab sərgiləri gənclərin mütaliəyə marağının artırılması, oxu mədəniyyətinin inkişafı və xalqlar arasında mədəni əlaqələrin möhkəmləndirilməsi baxımından mühüm əhəmiyyət daşıyır.
“Tehsil365” xəbər verir ki, bunu AZƏRTAC-a açıqlamasında Bakı Slavyan Universitetinin rektoru Anar Nağıyev deyib.
O bildirib ki, kitab sərgiləri oxucularla yazıçı və şairləri bir araya gətirməklə yanaşı, nəşriyyatlara da oxucu auditoriyası ilə daha yaxından əlaqə qurmaq imkanı yaradır.
Rektor mütaliənin insanın şəxsiyyət kimi formalaşmasındakı roluna toxunaraq deyib: “İnsan mütaliə etdikcə öz xarakterini öyrənməyə, özünü tanımağa başlayır. İnsan mütaliə etdikcə cəmiyyətə necə təsir göstərə biləcəyini, ona necə töhfə verə biləcəyini öyrənir”.
Onun sözlərinə görə, Bakı Beynəlxalq Kitab Sərgisinin əsas məqsədlərindən biri gənclərin kitaba marağını artırmaqdır. Belə tədbirlər nəticəsində daha çox gəncin kitabxanalara üz tutması sərginin mühüm nailiyyəti sayıla bilər.
“Əgər biz bu sərgilərin nəticəsində hər il onlarla, yüzlərlə yeni gəncin kitabxanalara üz tutmasını təşviq edə biliriksə, bu, artıq sərginin böyük nailiyyətidir”, - deyə rektor vurğulayıb.
A.Nağıyev kitabların xalqlar arasında qarşılıqlı anlaşmanın güclənməsinə də töhfə verdiyini bildirib. O qeyd edib ki, sərgidə müxtəlif ölkələrin səfirliklərinin kitablarını təqdim etməsi həmin ölkələrin mədəniyyətini tanıtmaq baxımından əhəmiyyətlidir.
“Kitab və mütaliə mədəniyyəti insanları bir-birinə, xalqları bir-birinə yaxınlaşdırır, bir-birini tanımağa kömək edir”, - deyə o əlavə edib.
Rektor Mədəniyyət Nazirliyinin bu istiqamətdə gördüyü işləri yüksək qiymətləndirib. O, kitab sərgilərinin mütaliənin təşviqinə müsbət təsir göstərdiyini, regionlarda da bu cür tədbirlərin təşkilinə təkan verdiyini bildirib.