XII Bakı Beynəlxalq Kitab Sərgisi çərçivəsində Türk Mədəniyyəti və İrsi Fondu tərəfindən nəşr olunan “Xaqani Şirvani – pyeslər toplusu” kitabının təqdimatı keçirilib.
“Tehsil365” xəbər verir ki, tədbirdə çıxış edən Türk Mədəniyyəti və İrsi Fondunun prezidenti Aktotı Raimkulova topluya Xalq şairi Məmməd Rahimin “Xaqani”, Zeynal Xəlilin “Şairin yuxusu” və Novruz Gəncəlinin “Zəlzələ” pyeslərinin daxil edildiyini bildirib. O qeyd edib ki, bu əsərlər dahi Azərbaycan şairi Xaqani Şirvaninin şəxsiyyətini, yaşadığı dövrü və zəngin ədəbi irsini daha dərindən anlamaq baxımından mühüm əhəmiyyət daşıyır.
A.Raimkulovanın sözlərinə görə, Fondun bu toplunu nəşr etdirməkdə əsas məqsədlərindən biri Xaqani Şirvaninin həyat və yaradıcılığından bəhs edən əsərlərə yenidən səhnə həyatı qazandırmaqdır. Belə ki, topluya daxil edilən pyeslər hazırda Azərbaycan teatrlarının repertuarında yer almır və uzun müddətdir tamaşaçılara təqdim olunmur.
“Ümid edirik ki, Türk dünyasının tanınmış rejissorları və teatr ictimaiyyətinin nümayəndələri bu topludan yararlanaraq həmin əsərləri yenidən səhnələşdirəcək, Xaqaninin həyat və yaradıcılığını tamaşaçılara təqdim edəcəklər. Dahi şair Xaqani Şirvani qəzəllərini farsca yazmasına baxmayaraq, türk olduğunu və türklərin Tanrısı Tenqriyə tapındığını ifadə edib. Orta əsrlərdə öz milli kimliyini, türk mənsubiyyətini qürurla dilə gətirən Xaqaninin ədəbi irsini biz də eyni iftixar hissi ilə təbliğ etməliyik və edirik”, – deyə Fondun prezidenti vurğulayıb.
Tədbirdə çıxış edən AMEA-nın Nizami Gəncəvi adına Ədəbiyyat İnstitutunun əməkdaşı, filologiya üzrə fəlsəfə doktoru, dosent Elnarə Zeynalova Xaqani Şirvaninin zəngin ədəbi irsindən, yaradıcılığının özünəməxsus xüsusiyyətlərindən və Şərq ədəbiyyatındakı mövqeyindən danışıb. O bildirib ki, Xaqani Şirvaninin yaradıcılığı təkcə Azərbaycan ədəbiyyatı üçün deyil, bütövlükdə Şərq ədəbi-fəlsəfi düşüncəsi baxımından böyük əhəmiyyət daşıyır. Şairin əsərlərində yaşadığı dövrün ictimai-mədəni mühiti, müxtəlif dini və fəlsəfi baxışlar, eləcə də insanın mənəvi dünyası geniş əksini tapıb.
Akademik Nizami Cəfərov Xaqani irsinin hərtərəfli araşdırılmasının, əsərlərindəki tarixi, fəlsəfi və poetik məqamların öyrənilməsinin vacibliyini vurğulayıb.
Bildirilib ki, şairin yaradıcılığına müxtəlif aspektlərdən yanaşılması onun ədəbi irsinin daha dərindən dərk edilməsinə və geniş auditoriyaya tanıdılmasına imkan yaradır.
Qeyd edək ki, topluya daxil edilən hər üç pyesdə Xaqani Şirvaninin yaşadığı dövr, həmin dövrün hökmdarları, şairin müasirləri, eləcə də ictimai-siyasi və ədəbi-mədəni mühit bədii təxəyyülün imkanları ilə canlandırılıb. Əsərlər dahi şairin həyat və yaradıcılığına fərqli baxış bucaqlarından nəzər salmağa, onun şəxsiyyətini və yaşadığı dövrün xüsusiyyətlərini daha yaxından tanımağa imkan verir.