“Azərbaycan Tibb Universitetinin (ATU) müəllim və tələbələrinin də iştirak etdiyi elmi tədqiqat İspaniyanın Barselona şəhərində keçirilən beynəlxalq konqresdə mükafata layiq görülüb”.
“Tehsil365” xəbər verir ki, tədqiqat ATU, Yeni Klinika və İtaliyanın Bolonya Universitetinin nümayəndələrinin birgə əməkdaşlığı çərçivəsində hazırlanıb. Elmi iş “UEG Week 2026” beynəlxalq konqresində təqdim olunub.
Tədqiqat mədə xərçənginin müalicəsində istifadə edilən iki kimyaterapiya rejiminin — FOLFOX və FLOT-un nəticələrinin müqayisəsinə həsr olunub. Araşdırma çərçivəsində müalicə üsullarının effektivliyi və pasiyentlərdə müşahidə olunan yan təsirlər qiymətləndirilib.
Tədqiqatın nəticələrinə əsasən, araşdırılan pasiyent qrupu üzrə FOLFOX rejimi FLOT rejimindən geri qalmayan nəticələr göstərib. Eyni zamanda, FOLFOX tətbiq edilən qrupda neytropeniya hallarının daha az müşahidə olunduğu bildirilib. Neytropeniya infeksiyalara qarşı mübarizədə mühüm rol oynayan neytrofil hüceyrələrinin sayının azalması ilə xarakterizə olunur.
Elmi işin beynəlxalq konqresdə mükafatlandırılması Azərbaycan tibb mütəxəssislərinin beynəlxalq elmi platformalarda iştirakının və xarici universitetlərlə əməkdaşlığının əhəmiyyətini bir daha diqqətə çatdırır.
Qeyd edək ki, “UEG Week” həzm sistemi xəstəlikləri sahəsində elmi yeniliklərin, klinik tədqiqatların və müasir müalicə yanaşmalarının təqdim olunduğu beynəlxalq tədbirlərdən biridir.