“Xankəndidə keçirilən "SOCGOV 2026" beynəlxalq forumu sosial xidmətlərin inkişafında yeni texnoloji yanaşmaların, innovativ idarəetmə modellərinin və beynəlxalq əməkdaşlığın təşviqi baxımından mühüm təşəbbüsdür. Forumun əsas əhəmiyyəti yalnız rəqəmsal yeniliklərin təqdim edilməsində deyil, həm də sosial xidmətlərin gələcəyinə dair ideyaların birgə müzakirəsi və praktik həllərin axtarışındadır”.
“Tehsil365” xəbər verir ki, bu fikirləri “İnformasiya və Sosial Təşəbbüslərə Dəstək” İctimai Birliyinin sədri Cəsarət Hüseynzadə oktyabrın 23-də Xankəndidə keçirilən “SOCGOV 2026: Ağıllı idarəetmə üçün rəqəmsal təhlil” beynəlxalq forumunu şərh edərkən bildirib.
QHT sədri qeyd edib ki, forumun məhz Xankəndidə təşkil olunması ayrıca əhəmiyyət daşıyır: “Son dövrlərdə Xankəndinin müxtəlif yerli və beynəlxalq tədbirlərə ev sahibliyi etməsi şəhərin yeni inkişaf mərhələsinin mühüm göstəricilərindəndir. Sosial idarəetmə, süni intellekt və rəqəmsal transformasiya kimi qlobal əhəmiyyətli mövzuların burada müzakirə olunması Xankəndinin beynəlxalq əməkdaşlıq və innovativ ideyalar üçün mühüm məkana çevrilməsinə xidmət edir.
"SOCGOV 2026"nın keçirilməsi ölkəmizdə rəqəmsal inkişaf sahəsində aparılan sistemli islahatlarla da səsləşir. "Azərbaycan Respublikasının 2025–2028-ci illər üçün süni İntellekt Strategiyası"nın qəbul edilməsi, Prezident İlham Əliyevin 2026-cı ilin fevralında imzaladığı sənədlər əsasında Birinci vitse-prezident Mehriban Əliyevanın rəhbərliyi ilə Rəqəmsal İnkişaf Şurasının yaradılması və rəqəmsal inkişafın sürətləndirilməsinə dair 2026–2028-ci illər üçün Fəaliyyət Planının təsdiqlənməsi bu sahədə yeni prioritetləri müəyyənləşdirir. Belə bir dövrdə "SOCGOV"un keçirilməsi forumun aktuallığını və burada aparılan müzakirələrin nəticəyönümlü əhəmiyyətini daha da artırır”.
QHT sədri forumun təşkilati formatını da müsbət qiymətləndirib: “SOCGOV 2026"nın fərqləndirici cəhətlərindən biri ənənəvi tədbir formatından kənara çıxmasıdır. Dövlət və özəl sektor nümayəndələrinin debatları, iştirakçıların tematik qruplarda birgə işləməsi, yeni ideyaların müzakirəsi və konkret təkliflərin hazırlanması forumun praktik nəticələrə istiqamətləndiyini göstərir.
Xüsusilə yeni ideyaların kollektiv şəkildə işlənməsi, müxtəlif sahələri təmsil edən mütəxəssislərin birgə həll axtarışına qoşulması beynəlxalq beyin fırtınası formatının uğurlu nümunəsi kimi qiymətləndirilə bilər. Bu yanaşma gələcək forumların təşkilində də faydalı model ola bilər.
Eyni zamanda, iştirakçılar üçün şəbəkələşmə imkanlarının yaradılması mühüm üstünlükdür. Belə platformalarda rəsmi müzakirələr qədər qeyri-formal peşəkar əlaqələrin qurulması, yeni tərəfdaşlıqların formalaşması və fərqli ölkələrin təcrübələrinin öyrənilməsi də böyük əhəmiyyət daşıyır”.
Cəsarət Hüseynzadə forumun beynəlxalq nüfuzunun artmasını və mükafatlandırma mexanizmini də diqqətəlayiq hesab edib: “SOCGOV-un cəmi ikinci dəfə keçirilməsinə baxmayaraq, artıq Beynəlxalq Sosial Təminat Assosiasiyası (BSTA) kimi nüfuzlu qurumların rəsmi təqvimində yer alması müsbət göstəricidir. Dünyanın 12 ölkəsindən 300-ə yaxın nümayəndənin iştirakı forumun beynəlxalq əhatəsinin genişləndiyini nümayiş etdirir.
Forum çərçivəsində yerli və beynəlxalq nominasiyalar üzrə qabaqcıl təcrübələrin mükafatlandırılması da xüsusi təqdirəlayiqdir. Bu təşəbbüs innovativ həllərin tanıdılmasına, uğurlu modellərin təşviqinə və sosial xidmətlər sahəsində sağlam rəqabət mühitinin formalaşmasına əlavə stimul verir".