Bakıya ilk dəfə səfər edirəm. Şəhərlə bağlı təəssüratlarım olduqca müsbətdir. Məni ən çox təsirləndirən insanların səmimiyyəti, mehribanlığı və qonaqpərvərliyi oldu.
“Tehsil365” xəbər verir ki, bu barədə AZƏRTAC-a açıqlamasında XII Bakı Beynəlxalq Kitab Sərgisində iştirak edən tanınmış britaniyalı yazıçı Darren Simpson söyləyib.
Yazıçı qeyd edib ki, XII Bakı Beynəlxalq Kitab Sərgisində ədəbiyyata, kitablara və mütaliəyə göstərilən böyük maraq da onda xoş təəssürat yaradıb.
“Bu qədər insanın ədəbiyyata sevgi və həvəslə yanaşdığını görmək həqiqətən ruhlandırıcıdır. Bakıda hələ ilk günüm olsa da, indiyədək qazandığım təəssüratlar olduqca xoşdur”, – deyə o əlavə edib.
Azərbaycanlı oxucularla görüşün onun üçün xüsusi əhəmiyyət daşıdığını vurğulayan D.Simpson bildirib ki, sərgi çərçivəsində artıq bir neçə oxucu ilə ünsiyyət qurmaq imkanı əldə edib.
“Yazıçılığa maraq göstərən, yaradıcılıqla məşğul olan gənclərin olması məni xüsusilə sevindirir. Oxucuların ədəbiyyata həvəsi, verdikləri düşündürücü suallar və əsərlər haqqında dərin mülahizələri olduqca təsirlidir. Əvvəllər də Azərbaycandakı mütaliə qrupları ilə onlayn şəkildə ünsiyyətdə olmuşam. İndi isə həmin oxucularla şəxsən görüşmək mənim üçün xüsusi əhəmiyyət daşıyır”, – deyə yazıçı qeyd edib.
Kitab sərgilərinin xüsusilə uşaqlarda mütaliəyə marağın formalaşdırılmasında mühüm rol oynadığını bildirən D.Simpson belə tədbirlərin gənc nəslin ədəbiyyata münasibətinə müsbət təsir göstərdiyini vurğulayıb.
“Uşaqları kitabların, yazıçıların və ədəbiyyata böyük həvəs göstərən insanların əhatə etdiyi mühitə gətirmək onlarda mütaliəyə maraq oyatmaq baxımından olduqca əhəmiyyətlidir. Belə sərgilər uşaqlara yeni müəlliflər və əsərlər kəşf etmək, kitabların maraqlı dünyası ilə yaxından tanış olmaq imkanı yaradır. Bəzən əvvəllər mütaliəyə maraq göstərməyən uşaqlar belə tədbirlər sayəsində kitab oxumağı sevdiklərini kəşf edə bilərlər. Bakı Beynəlxalq Kitab Sərgisi mütaliə mədəniyyətinin təşviqində, gənc nəslin ədəbiyyata marağının artırılmasında, eləcə də müxtəlif ölkələrin yazıçıları və oxucuları arasında ədəbi-mədəni əlaqələrin möhkəmləndirilməsində mühüm rol oynayır”, – deyə Darren Simpson fikirlərini yekunlaşdırıb.