ADU-nun rektoru, akademik Kamal Abdulla şura üzvlərini salamlayıb, gündəlikdə duran məsələlərdən danışıb.
“Tehsil365” xəbər verir ki, Daha sonra tanınmış politoloq, professor Ramiz Yunusun ADU-nun fəxri professoru adının təqdim olunması ilə bağlı səsvermə keçirilib və qərar yekdilliklə qəbul olunub.
Rektor çıxışında professor Ramiz Yunusun Azərbaycan həqiqətlərini dünya ictimaiyyətinə çatdırılmasındakı rolunu xüsusi vurğulayıb.
Səsvermədən sonra çıxış edən Ramiz Yunus göstərilən böyük etimada görə universitet rəhbərliyinə təşəkkürünü bildirib.
O, həmçinin gənc nəslə analitik düşüncə, milli məsuliyyət və gələcəyə inam ötürməyin əsas prioritet olduğunu qeyd edib.
Ramiz Yunus sonda hər kəsi gələn həftə ADU-da “Subyekt olmaq” mövzusunda keçiriləcək mühazirəni dinləməyə dəvət edib.
ADU-nun rektoru, akademik Kamal Abdulla Alman dilinin fonetikası və qrammatikası kafedrasının baş müəllimi Məryəm Babayevanı ADU-da əmək fəaliyyətinin 50 illik yubileyi münasibətilə təbrik edib.
Daha sonra elmi şurada İspaniya Krallığının Servantes İnstitutu və Azərbaycan Dillər Universiteti arasında əməkdaşlıq müqaviləsinin imzalanma mərasimi olub.
İmzalanma mərasimində ADU-nun rektoru, akademik Kamal Abdulla, Servantes İnstitutunun direktoru Fernando Vara de Rey və İspaniyanın Bakıdakı səfirliyinin müvəqqəti işlər vəkili Xose Pedro Torrubia iştirak ediblər.
Mərasim çərçivəsində imzalanan əməkdaşlıq müqaviləsinin Azərbaycan və İspaniya arasında təhsil, elm və mədəniyyət sahələrində əlaqələrin genişləndirilməsinə töhfə verəcəyi vurğulanıb.
Sənədin iki qurum arasında akademik əməkdaşlığın inkişafı, ispan dilinin tədrisinin təşviqi, eləcə də birgə elmi və mədəni layihələrin həyata keçirilməsi üçün yeni imkanlar yaradacağı qeyd olunub.
Akademik Kamal Abdulla Azərbaycan Dillər Universitetinin beynəlxalq əməkdaşlığın genişləndirilməsinə, xarici dillərin tədrisinin təkmilləşdirilməsinə və müxtəlif ölkələrin mədəniyyətləri arasında qarşılıqlı anlaşmanın gücləndirilməsinə xüsusi önəm verdiyini bildirib. O, Servantes İnstitutu ilə əməkdaşlığın universitetdə ispan dilinin və İspaniya mədəniyyətinin təbliği baxımından əhəmiyyətini diqqətə çatdırıb.
Servantes İnstitutunun direktoru Fernando Vara de Rey isə əməkdaşlığın ispan dilinin və ispan mədəniyyətinin Azərbaycanda daha geniş tanıdılmasına, iki ölkənin təhsil və mədəniyyət müəssisələri arasında əlaqələrin möhkəmlənməsinə xidmət edəcəyinə əminliyini ifadə edib.
İmzalanma mərasimi Azərbaycan və İspaniya arasında mövcud mədəni-humanitar əlaqələrin inkişafı, eləcə də təhsil və elm sahələrində yeni əməkdaşlıq imkanlarının yaradılması istiqamətində mühüm addım kimi dəyərləndirilib.
Daha sonra Keyfiyyətin təminatı və monitorinqi şöbəsinin müdiri, dosent Fatma Qurbanzadə, Strateji inkişaf və planlama şöbəsinin müdiri Röya Əliyeva, Linqvokulturologiya kafedrasının müdiri, professor Vüsalə Ağabəyli hesabatlarla çıxış ediblər.
Hesabatlarda müvafiq struktur bölmələri üzrə həyata keçirilən fəaliyyətin əsas istiqamətləri, əldə olunan nəticələr və qarşıda duran vəzifələr diqqətə çatdırılıb. Universitetdə təhsilin keyfiyyətinin yüksəldilməsi, tədris prosesinin monitorinqinin gücləndirilməsi, strateji hədəflərin icrası və elmi fəaliyyətin inkişafı istiqamətində görülən işlər barədə məlumat verilib.
Çıxışlar zamanı mövcud fəaliyyətin təkmilləşdirilməsi, müəyyən edilmiş hədəflərə nail olunması və universitetin inkişaf strategiyasına uyğun tədbirlərin həyata keçirilməsinin vacibliyi vurğulanıb.
Elmi Şurada hesabatlar ətrafında müzakirələr aparılıb, səsləndirilən təkliflər nəzərdən keçirilib və müvafiq istiqamətlər üzrə fəaliyyətin daha da təkmilləşdirilməsi məsələləri diqqətə çatdırılıb.
Elmi şura cari məsələlər ətrafında aparılan fikir mübadiləsi ilə davam edib.