Azərbaycan Dövlət Neft və Sənaye Universitetinin (ADNSU) nümayəndələri Özbəkistana səfər çərçivəsində İslam Kərimov adına Daşkənd Dövlət Texniki Universitetində görüş keçiriblər. Görüşdə akademik mobillik, birgə elmi tədqiqatlar və təhsil proqramları üzrə əməkdaşlığın inkişaf perspektivləri müzakirə olunub.
“Tehsil365” xəbər verir ki, ADNSU-nu Əcnəbi tələbələrlə iş şöbəsinin müdiri Səbinə Əliyeva, şöbənin baş mütəxəssisi İlhamə Osmanova və İctimaiyyətlə əlaqələr və Marketinq şöbəsinin müdiri Xülya Sabirli təmsil ediblər.
Daşkənd Dövlət Texniki Universitetindən görüşdə “Metrologiya, texniki tənzimləmə, standartlaşdırma və sertifikatlaşdırma” kafedrasının müdiri, texnika elmləri doktoru, professor Paraxat Matyakubova, kafedranın dosenti, fəlsəfə doktoru Mirolim Maxmudjonov və doktorant Xolmurod Dilşodjon oğlu Muminov iştirak ediblər.
Müzakirələr zamanı tələbə və professor-müəllim heyətinin mübadiləsi, magistrant və doktorantlar üçün elmi-tədqiqat təcrübələrinin təşkili və doktorantlara birgə elmi rəhbərlik imkanları nəzərdən keçirilib. Akademik mobilliyin təşkili üçün uyğun təhsil proqramlarının və əməkdaşlıq istiqamətlərinin müəyyənləşdirilməsinin əhəmiyyəti vurğulanıb.
Tərəflər birgə elmi tədqiqatların aparılması, dərslik və tədris materiallarının hazırlanması, professor-müəllim heyətinin və tələbələrin iştirakı ilə elmi konfransların təşkili barədə fikir mübadiləsi aparıblar. Modul təhsil yanaşması əsasında birgə tədris təşəbbüslərinin hazırlanması perspektivləri də müzakirə olunub.
Görüşdə universitetlərarası tələbə olimpiadalarının və hakatonların keçirilməsi imkanlarına da toxunulub. Bu təşəbbüslər tələbələrin ixtisas biliklərini tətbiq etməsi, komanda şəklində işləməsi və birgə həllər hazırlaması üçün potensial əməkdaşlıq istiqamətləri kimi nəzərdən keçirilib.
Müzakirə olunan təkliflərin inkişaf etdirilməsi məqsədilə müvafiq təhsil proqramları və elmi maraq sahələri üzrə məlumat mübadiləsinin aparılması, əməkdaşlıqda iştirak edə biləcək struktur bölmələr arasında əlaqələrin qurulması imkanları dəyərləndirilib.