Sərgi çərçivəsində kitabxana öz fəaliyyəti, görmə məhdudiyyətli şəxslər üçün yaradılan mütaliə imkanları və fonduna yeni daxil olan səsli kitablarla ziyarətçilərin diqqətini cəlb edir. Təqdim olunan nəşrlər kitabxananın səsli kitab fondunun zənginləşdirilməsi və oxucuların ədəbiyyata əlçatanlığının artırılması istiqamətində görülən işləri əks etdirir.
“Tehsil365” xəbər verir ki, Kitab sərgisi kitabxanalar, nəşriyyatlar, müəlliflər və kitabsevərlər arasında ünsiyyətin genişləndirilməsi, yeni nəşrlərin tanıdılması və mütaliə mədəniyyətinin təşviqi baxımından mühüm platformadır. Respublika Gözdən Əlillər Kitabxanasının sərgidə iştirakı da inklüziv kitabxana xidmətlərinin əhəmiyyətinin ictimaiyyətə çatdırılmasına xidmət edir.
Kitabxana görmə məhdudiyyətli şəxslərin informasiya resurslarına bərabər çıxış imkanlarının genişləndirilməsi, səsli kitabların sayının artırılması və mütaliənin daha əlçatan olması istiqamətində fəaliyyətini davam etdirir.
XII Bakı Beynəlxalq Kitab Sərgisində iştirak kitabxananın təcrübəsinin bölüşdürülməsi, fəaliyyətinin daha geniş auditoriyaya tanıdılması və kitab mədəniyyətinin təşviqi baxımından əhəmiyyət daşıyır.