Dənizkənarı Milli Parkın ərazisində keçirilən Zeytun Festivalının ikinci günü də maraqlı təqdimatlar, xoş ab-hava və əyləncəli proqramla davam edir.
“Tehsil365” xəbər verir ki, oktyabrın 24-də də Bakı Bulvarında qurulan pavilyonlarda istehsalçılar zeytun və zeytun məhsullarının geniş çeşidini təqdim edirlər.
Ziyarətçilərin festivala olan marağı nəzərə alınaraq tədbir məkanında səhər saatlarından axşamadək əyləncəli proqram təşkil olunacaq. Gün ərzində bulvarda səslənən musiqi, tanınmış sənətçilərin çıxışları festivalın bayram ovqatını tamamlayacaq.
Qazaxıstanlı festival qonağı Oksana Abramova qeyd edib ki, Azərbaycana səyahətinin ilk günündə təsadüfən festivala qatılıb. O, festivalın möhtəşəm ab-havasından, insanların mehribanlığından və Bakı bulvarının gözəlliyindən məmnun qaldığını bildirib. Zeytunun dadına baxdıqlarını və çox bəyəndiklərini deyən turist Azərbaycana yenidən gəlmək istədiyini vurğulayıb.
Festivalın digər qonağı Zəmanə Həmidova isə qeyd edib ki, tədbir onun üçün bir sıra yeni məlumatlar əldə etmək baxımından maraqlıdır. O bildirib ki, indiyədək zeytun mürəbbəsinin mövcudluğundan xəbərsiz olub və festivalda bununla tanış olmaq imkanı qazanıb. Zəmanə Həmidova gənclərin festivala göstərdiyi marağı yüksək qiymətləndirərək, layihənin çox yaxşı təşkil olunduğunu və xoş təəssürat yaratdığını vurğulayıb.
Bu gün DJ Kamo, Rilaya, Mərdan Kazımov, axşam saatlarında isə Orxan Zeynallı, Xəyyam Nisanov və Zülfiyyə Xanbabayeva konsert proqramı ilə çıxış edəcəklər.
Qeyd edək ki, Zeytun Festivalı Dövlət Turizm Agentliyi və Dənizkənarı Bulvar İdarəsinin dəstəyi, “Absheron Olive Gardens” və “Olivea” zeytun məhsullarının sponsorluğu ilə keçirilir.
Tədbirin əsas məqsədi Azərbaycanın qədim zeytunçuluq ənənələrinin təbliği, yerli istehsalçıların tanıdılması və dəstəklənməsi, eləcə də bu sahədə milli brendin formalaşdırılmasına töhfə verməkdir.
Festival ərazisinə giriş, əyləncə və konsert proqramlarına qoşulmaq ödənişsizdir.
Festival oktyabrın 25-də də davam edəcək. Həmin gün pavilyonlarla tanışlıqla yanaşı, Xalq artisti Aygün Kazımova, Azad Şabanov, Zamiq Hüseynov, Teymur Süleymanbəyli, “Excellent band” və “Wave band” qruplarının konserti olacaq.