“Buraxılış imtahanlarında sualların çətinlik səviyyəsinin qiymətləndirilməsi yalnız şagirdlərin və valideynlərin rəyləri əsasında aparılmamalıdır. Təhsil tədqiqatçısı Elmin Nuri hesab edir ki, bu məsələdə statistik və elmi təhlillərə, eləcə də tədris proqramları ilə qiymətləndirmə meyarları arasındakı uyğunluğa diqqət yetirilməlidir”.
“Tehsil365” xəbər verir ki, bu barədə təhsil tədqiqatçısı Elmin Nuri AzEdu.az-ın podkastında danışıb.
Onun sözlərinə görə, buraxılış imtahanlarından sonra sosial şəbəkələrdə sualların çətinliyi, keyfiyyəti və düzgünlüyü ilə bağlı müxtəlif fikirlər səsləndirilir. Lakin imtahan suallarının səviyyəsi barədə yekun nəticəyə gəlmək üçün elmi yanaşma əsas götürülməlidir.
Elmin Nuri bildirib ki, sualların çətinlik dərəcəsini müəyyənləşdirmək üçün imtahan nəticələri və statistik göstəricilər təhlil olunmalıdır. Bu məlumatlar əsasında sualların şagirdlərin bilik səviyyəsinə uyğunluğu daha obyektiv qiymətləndirilə bilər.
Təhsil tədqiqatçısı vurğulayıb ki, testologiyanın əsas prinsiplərindən biri sualların çətinlik səviyyəsinə görə düzgün bölüşdürülməsidir. İmtahanda asan, orta və çətin suallar arasında balans qorunmalıdır. Bu yanaşma şagirdlərin bilik və bacarıqlarının daha dolğun qiymətləndirilməsinə xidmət edir.
Onun fikrincə, buraxılış imtahanlarında yaranan çətinlikləri yalnız test sualları ilə əlaqələndirmək düzgün deyil. Tədris prosesinin təşkili, şagirdlərin hazırlıq səviyyəsi və qiymətləndirmə meyarları da nəzərə alınmalıdır.
Elmin Nuri qeyd edib ki, Dövlət İmtahan Mərkəzi sualları mövcud təhsil proqramları və məzmun standartları əsasında hazırlayır. Bununla belə, şagirdlərin hazırlıq prosesinin həmin standartlara nə dərəcədə uyğun qurulması da mühüm əhəmiyyət daşıyır.
Tədqiqatçı hesab edir ki, şagirdlər və valideynlər imtahanların qiymətləndirilməsi prinsipləri, tədris proqramları və məzmun standartları barədə daha ətraflı məlumatlandırılmalıdırlar. Bu, imtahan nəticələrinin daha düzgün anlaşılmasına və hazırlıq prosesində mövcud çatışmazlıqların müəyyənləşdirilməsinə kömək edə bilər.