XII Bakı Beynəlxalq Kitab Sərgisi çərçivəsində Xalq yazıçısı Elmira Axundovanın “Гейдар Алиев – основатель политики азербайджанского мультикультурализма” (“Heydər Əliyev – Azərbaycan multikulturalizmi siyasətinin banisi”) kitabının təqdimatı keçirilib.
“Tehsil365” AZƏRTAC-a istinadən xəbər verir ki, rus dilində nəşr olunan kitab akademik Kamal Abdullanın ideya rəhbərliyi və təşkilatçılığı ilə işıq üzü görüb.
Tədbirdə çıxış edən akademik Kamal Abdulla nəşrin əhəmiyyətindən danışaraq bildirib ki, kitabda Ümummilli Lider Heydər Əliyevin multikulturalizm siyasəti və bu istiqamətdəki fəaliyyəti geniş işıqlandırılıb. O qeyd edib ki, əsər multikulturalizm ideyalarının Azərbaycan cəmiyyətində inkişafının öyrənilməsi baxımından mühüm əhəmiyyət daşıyır.
Türk Mədəniyyəti və İrsi Fondunun prezidenti Aktotı Raimkulova çıxışında Ümummilli Lider Heydər Əliyevin zəngin siyasi irsindən bəhs edib. O bildirib ki, Ulu Öndərin tolerantlıq və mədəniyyətlərarası dialoq prinsiplərinə əsaslanan siyasəti müasir Azərbaycanın inkişafı üçün möhkəm təməl yaradıb.
Fondun prezidenti qeyd edib ki, rəhbərlik etdiyi qurumun prioritet istiqamətlərindən biri Türk dünyasının görkəmli şəxsiyyətlərinin irsinin təbliğidir. Bu məqsədlə müxtəlif nəşrlər hazırlanır, onların ayrı-ayrı dillərə tərcüməsi həyata keçirilir və bununla da türk xalqları arasında mədəni əlaqələrin, qarşılıqlı anlaşmanın və birliyin möhkəmləndirilməsinə töhfə verilir.
Aktotı Raimkulova Elmira Axundovanın Ümummilli Liderin irsinin araşdırılması və qorunması istiqamətindəki fəaliyyətini yüksək qiymətləndirərək bildirib ki, Fond kitabın daha geniş oxucu auditoriyasına çatdırılması məqsədilə qazax və digər dillərə tərcüməsini, eləcə də nəşrini planlaşdırır.
Azərbaycan Yazıçılar Birliyinin sədr müavini Rəşad Məcid çıxışında Azərbaycan multikulturalizminin təbliğində akademik Kamal Abdullanın və onun rəhbərlik etdiyi qurumun mühüm rolunu vurğulayıb. O, bu istiqamətdə həyata keçirilən layihələrin və görülən işlərin əhəmiyyətini diqqətə çatdırıb.
Rəşad Məcid qeyd edib ki, Ümummilli Lider Heydər Əliyevin multikulturalizm sahəsindəki fəaliyyəti və baxışlarına həsr olunan kitabın məhz Elmira Axundova tərəfindən qələmə alınması xüsusi əhəmiyyət daşıyır. O, yazıçının Heydər Əliyevin həyat və siyasi irsinin araşdırılmasına həsr etdiyi sənədli-publisistik əsərlərin dəyərini də yüksək qiymətləndirib.
Daha sonra çıxış edən Xalq yazıçısı Natiq Rəsulzadə nəşrin əhəmiyyətindən danışıb, Elmira Axundovanın ədəbi yaradıcılığına və sənədli-publisistik fəaliyyətinə toxunub. O, yazıçının Ümummilli Lider Heydər Əliyevin həyat və fəaliyyətinin araşdırılmasına həsr etdiyi əsərlərin əhəmiyyətini diqqətə çatdırıb.