Qərbi Azərbaycan İcması (QAİ) və Bakı Dövlət Universitetinin (BDU) birgə təşkilatçılığı ilə 2026/2027-ci tədris ilində ali məktəblərə qəbul imtahanlarında yüksək bal toplamış Qərbi Azərbaycandan olan gənclərlə görüş keçirilib.
“Tehsil365” “AZƏRTAC” a istinadən xəbər verir ki, tədbiri giriş sözü ilə açan BDU rektoru Elçin Babayev yüksək balla tələbə adını qazanmış gəncləri və Prezident təqaüdçülərini təbrik edərək, bu uğurun gələcək nailiyyətlər üçün böyük stimul və mənəvi məsuliyyət olduğunu vurğulayıb. Rektor bildirib ki, Prezident İlham Əliyevin rəhbərliyi ilə həyata keçirilən dövlət siyasətində təhsilin inkişafına və istedadlı gənclərin dəstəklənməsinə xüsusi önəm verilir. Universitetdə fəaliyyət göstərən Qərbi Azərbaycan Araşdırmaları Mərkəzinin işinə toxunan rektor bu torpaqların tarixi və mədəni irsinin elmi əsaslarla araşdırıldığını diqqətə çatdırıb və gəncləri tarixi yaddaşı yaşatmağa çağırıb: “İnanıram ki, siz də gələcəkdə bu ənənələri davam etdirəcək, müxtəlif sahələrdə uğurlu mütəxəssis kimi yetişəcəksiniz. Ailələrinizdə qorunan yaddaşı, Qərbi Azərbaycanın tarixi və mədəni irsini yaşatmaqda və gələcək nəsillərə çatdırmaqda sizin mühüm rolunuz var”.
Qərbi Azərbaycan İcması İdarə Heyətinin sədri, Milli Məclisin üzvü Əziz Ələkbərli gəncləri göstərdikləri yüksək nəticələr münasibətilə təbrik edib və onlara uğurlar arzulayıb. İcma sədri bildirib ki, Qərbi Azərbaycan həqiqətlərinin dünyaya çatdırılması, tarixi yaddaşın qorunması və Qayıdış Konsepsiyasının həyata keçirilməsində savadlı, vətənpərvər və fəal gənclərin üzərinə böyük məsuliyyət düşür. O, gənclərin Qərbi Azərbaycanın tarixi, milli-mədəni irsi və doğma torpaqlara qayıdış ideyası ilə bağlı biliklərini artırmasının vacibliyini də diqqətə çatdırıb.
İcmanın Müşahidə Şurasının sədri, BDU-nun Mexanika-riyaziyyat fakültəsinin Ali riyaziyyat və riyaziyyatın tədrisi metodikası kafedrasının müdiri, professor Misir Mərdanov, Ağsaqqallar Şurasının və Milli Məclisin Səhiyyə komitəsinin sədri Əhliman Əmiraslanov, QAİ İdarə Heyətinin üzvü, Azərbaycan Dövlət Pedaqoji Universitetinin beynəlxalq əlaqələr üzrə prorektoru, professor Mahirə Hüseynova, QAİ Gənclər Şurası və Milli Məclisin Gənclər və İdman komitəsinin sədri Şahin İsmayılov, qəbul imtahanlarında 697.5 bal toplayan, Prezident təqaüdçüsü Zəfər Həsənli çıxışlarında gəncləri Qərbi Azərbaycan həqiqətlərini daha dərindən öyrənməyi, seçdikləri ixtisasa dərindən yiyələnməyi, təhsil illərindən səmərəli istifadə etməyi, gələcəkdə qazanacaqları bilikləri ölkəmizin inkişafına, müstəqilliyinin və suverenliyinin qorunmasına yönəltməyi tövsiyə ediblər.
Sonda qəbul imtahanlarında ən yüksək nəticə göstərən Qərbi Azərbaycandan olan gənclərə təşəkkürnamə və hədiyyələr verilib.