Bakı Dövlət Universitetinin (BDU) iki komandası 51-ci Universitetlərarası Beynəlxalq Proqramlaşdırma Müsabiqəsinin (ICPC) Azərbaycan üzrə final mərhələsinə vəsiqə qazanıb.
“Tehsil365” AZƏRTAC-a istinadən xəbər verir ki, ICPC Azərbaycan İcmasının, Azərbaycan Texniki Universitetinin və ADA Universitetinin təşkilatçılığı, İnnovasiya və Rəqəmsal İnkişaf Agentliyinin tərəfdaşlığı ilə keçirilən və 23 ali təhsil müəssisəsindən 162 komandanın qatıldığı müsabiqənin təsnifat mərhələsində BDU-nun "BSU 1" və "BSU 2" komandaları II dərəcə ilə qiymətləndirilib. Hər iki komanda BDU-nun Tətbiqi riyaziyyat və kibernetika fakültəsinin tələbələrindən ibarətdir. "BSU 1" komandasını Mirağa Əliyev, Fuadxan Səfərov və Şəhrud İsmayılov, "BSU 2" komandasını isə Elşən Məhərrəmov, Mehdi Məmmədov və Kənan Sadıqlı təmsil edirlər.
Komanda üzvlərindən Mirağa Əliyev fakültədə magistratura səviyyəsində təhsil alır və BDU-nun İnformasiya texnologiyaları və proqramlaşdırma şöbəsinin mütəxəssisi kimi çalışır. Mehdi Məmmədov isə fakültənin tələbəsi olmaqla yanaşı, Azərbaycan-Koreya Kompüter Elmləri Mərkəzinin laborantıdır.
Hər iki komandanın məşqçiləri Azərbaycan-Koreya Kompüter Elmləri Mərkəzinin direktoru İsmayıl Zeynalov, həmin mərkəzin mütəxəssisi Nihat Qəribli və İnformasiya texnologiyaları və proqramlaşdırma şöbəsinin mütəxəssisi Emil Hüseynovdur.
Müsabiqədə komandalara 5 saat ərzində 14 alqoritmik məsələni C++, Java və ya Python proqramlaşdırma dillərində həll etmək və həlləri avtomatik qiymətləndirmə sistemində sınaqdan keçirmək tapşırığı verilib. Nəticələrə əsasən, 69 komanda ICPC-nin Azərbaycan üzrə final mərhələsinə çıxıb.
Qeyd edək ki, regional mərhələni müvəffəqiyyətlə başa vuracaq komandalar Gürcüstanın Tbilisi şəhərində keçiriləcək 51-ci ICPC-nin yarımfinal mərhələsində və Cənubi Qafqaz Açıq Çempionatında komanda və fərdi nominasiyalar üzrə iştirak etmək hüququ əldə edəcəklər.