“Şəhərsalma və Memarlıq İli” biblioqrafiyası təkcə memarlıq və şəhərsalma sahəsində araşdırmalar aparan mütəxəssislər üçün deyil, geniş oxucu kütləsi üçün də maraq doğurur. Nəşr memarlıq tarixinə dair materiallarla, o cümlədən ötən əsrin əvvəllərində dərc olunmuş yazılarla tanış olmaq imkanı yaradır.
“Tehsil365” xəbər verir ki, bunu “AZƏRTAC”ın müxbiri ilə söhbətində Azərbaycan Memarlar İttifaqının İdarə Heyətinin sədri, Əməkdar memar, professor Elbay Qasımzadə deyib.
E.Qasımzadənin sözlərinə görə, nəşrdə təkcə müasir araşdırmalar deyil, ötən əsrin əvvəllərində dərc olunmuş materiallar haqqında da məlumatlar yer alıb.
“Biblioqrafiyada atamın – tanınmış memar və dövlət xadimi Ənvər Qasımzadənin adının çəkilib-çəkilmədiyini öyrənmək istədim. Məlum oldu ki, burada onun 1948-ci ildə dərc olunmuş məqaləsi, eləcə də sonrakı illərdə qələmə aldığı digər əsərlər göstərilib”, – deyə Elbay Qasımzadə bildirib.
E.Qasımzadə nəşrin hazırlanması üçün görülən işin miqyasını da xüsusi vurğulayıb və bu işə görə kitabxananın kollektivinə təşəkkür edib.
“Bu, çox böyük zəhmət tələb edən işdir, həqiqətən də çox böyük əmək sərf olunub. Kitabxananın kollektivi bu işin öhdəsindən gəlib. Onlara eşq olsun!” – deyə o vurğulayıb.
XII Bakı Beynəlxalq Kitab Sərgisi haqqında danışan E.Qasımzadə sərginin artıq gözəl ənənəyə çevrildiyini və bu ənənəni qoruyub saxlamağın, davam etdirməyin vacibliyini qeyd edib.
“Sərgi artıq sadə bir sərgi deyil, bir ənənədir. Yaxşı ənənələri isə yaşatmaq lazımdır”, – deyə o bildirib.