XII Bakı Beynəlxalq Kitab Sərgisi çərçivəsində “Mirvarid Dilbazi Poeziya Məclisi” İctimai Birliyinin təşkilatçılığı ilə ədəbiyyatımıza və milli-mədəni irsimizə həsr olunmuş silsilə tədbirlər təşkil edilib. Sərgi çərçivəsində əvvəlcə “Mirvarid Dilbazinin poeziya dünyası” mövzusunda ədəbi görüş keçirilib.
“Tehsil365” xəbər verir ki, İctimai Birlikdən AZƏRTAC-a bildirilib ki, tədbirdə Xalq şairi Mirvarid Dilbazinin zəngin yaradıcılıq yolundan, Azərbaycan poeziyasındakı özünəməxsus yerindən, vətənpərvərlik ruhu, mənəvi dəyərlər və insan sevgisi ilə yoğurulmuş poetik irsindən geniş bəhs olunub.
Çıxış edən şair, publisist Vaqif Osmanlı, “Mirvarid Dilbazi Poeziya Məclisi” İctimai Birliyinin İdarə Heyətinin üzvü Azadə Quliyeva, Əməkdar jurnalistlər Şəmsiyyə Kərimova və Əntiqə Qonaq, şair Səringül Sadə, aşıq Aidə Gülzar və birliyin üzvü Səyalı Dadaşova Mirvarid Dilbazinin Azərbaycan ədəbiyyatındakı xidmətlərindən, onun ölməz poeziyasının bu gün də oxucular tərəfindən böyük maraqla qarşılandığını diqqətə çatdırıblar. Görüşdə şairin həyat və yaradıcılığı ilə bağlı xatirələr bölüşülüb, sevilən şeirləri səsləndirilib.
Sərgi çərçivəsində keçirilən digər tədbir isə “Kəlağayım millidir, butalıdır, güllüdür” adlı ədəbi-mədəni görüş olub. “Mirvarid Dilbazi Poeziya Məclisi” İctimai Birliyi və “Kəlağayı ev-muzeyi”nin birgə təşkilatçılığı ilə baş tutan tədbirdə Azərbaycan kəlağayısının milli-mənəvi dəyərlərimizdəki yeri, tarixi, zəngin ənənələri və mədəni irsimizdəki əhəmiyyəti vurğulanıb.
Tədbirdə “Mirvarid Dilbazi Poeziya Məclisi” İctimai Birliyinin sədri, “Kəlağayı ev-muzeyi”nin direktoru Güllü Eldar Tomarlı kəlağayının xalqımızın milli kimliyini, qadınlarımızın zərifliyini, adət-ənənələrimizi və estetik düşüncəmizi özündə yaşadan qiymətli irs nümunəsi olduğunu bildirib. O, rəhbərlik etdiyi qurumlar tərəfindən kəlağayının təbliği, qorunması və gələcək nəsillərə ötürülməsi istiqamətində həyata keçirilən layihələr, nəşrlər və maarifləndirici tədbirlər barədə məlumat verib.
Sənaye və Texnologiya Kollecinin müəllimi, milli geyimlərimizin təbliğatçısı İlahə Nuriyeva Azərbaycan kəlağayısının tarixi, hazırlanma xüsusiyyətləri, milli geyim mədəniyyətimizdəki rolu və UNESCO-nun qeyri-maddi mədəni irs siyahısına daxil edilməsi barədə ətraflı danışıb.
Hər iki tədbirdə çıxış edən ziyalılar, şairlər, sənət adamları və qonaqlar Azərbaycan ədəbiyyatının və milli-mədəni irsimizin qorunmasının, təbliğinin vacibliyini qeyd ediblər. Görüşlərdə kəlağayı mövzusunda nəşr olunmuş kitablar təqdim edilib, Mirvarid Dilbazinin yaradıcılığı və milli dəyərlərimizlə bağlı fikirlər səsləndirilib.
XII Bakı Beynəlxalq Kitab Sərgisi çərçivəsində keçirilən bu görüşlər Azərbaycan ədəbiyyatının və mədəni irsinin tanıdılması, Xalq şairi Mirvarid Dilbazinin zəngin söz dünyasının, eləcə də kəlağayımızın milli sərvət kimi gələcək nəsillərə çatdırılması işinə mühüm töhfə olub.