“Mingəçevir Dövlət Universitetinin tələbələri STEAM Mərkəzində keçirilən maarifləndirici tədbirdə iştirak edərək innovativ təhsil yanaşmaları və müasir texnologiyaların tətbiqi imkanları ilə tanış olublar”.
“Tehsil365” xəbər verir ki, oktyabrın 26-da “Şəhərsalma və Memarlıq İli” çərçivəsində Mingəçevir STEAM Mərkəzində “STEAM ilə öyrənək, kəşf edək və inkişaf edək” mövzusunda maarifləndirici vorkşop keçirilib.
Tədbir Mingəçevir Dövlət Universitetinin Pedaqogika və psixologiya kafedrasının müəllimi Aytəkin Kərimovanın təşkilatçılığı ilə baş tutub. Görüşdə kafedranın müəllimi Türkanə Kazımlı və universitetin Texnologiya ixtisası üzrə təhsil alan tələbələri iştirak ediblər.
Tədbirin əsas məqsədi müasir təhsil texnologiyalarının tətbiqini təşviq etmək, iştirakçıların yaradıcı düşünmə və problem həll etmə bacarıqlarını inkişaf etdirmək, həmçinin elm, texnologiya, mühəndislik, incəsənət və riyaziyyatı birləşdirən STEAM yanaşmasının əhəmiyyətini diqqətə çatdırmaq olub.
Mingəçevir STEAM Mərkəzinin rəhbəri Müşfiq Tarıverdiyev mərkəzin fəaliyyəti, tədris imkanları və yaradılmış şərait barədə məlumat verib. O bildirib ki, STEAM təhsil modeli nəzəri biliklərin praktiki fəaliyyətlə əlaqələndirilməsinə, fənlərarası inteqrasiyanın gücləndirilməsinə və öyrənənlərin yaradıcı potensialının üzə çıxarılmasına imkan yaradır.
Görüşdə STEAM təhsilinin dayanıqlı inkişaf, resurslardan səmərəli istifadə, ekoloji məsuliyyət və müasir şəhər mühitinin formalaşdırılması baxımından əhəmiyyəti də vurğulanıb. Qeyd edilib ki, texnoloji biliklərin yaradıcı yanaşmalarla birləşdirilməsi enerji səmərəliliyi, ağıllı şəhər həlləri və innovativ layihələrin hazırlanması üçün yeni imkanlar açır.
Müşfiq Tarıverdiyev, həmçinin STEAM Azərbaycan layihəsi çərçivəsində mərkəzlərdə şagirdlərin elmi-texniki biliklərini və praktiki bacarıqlarını inkişaf etdirməyə yönəlmiş təlimlərin keçirildiyini diqqətə çatdırıb. Bu təlimlərdə kodlaşdırma, robototexnika, proqramlaşdırma, süni intellekt, dron texnologiyaları, alternativ enerji və digər istiqamətlər əhatə olunur.
Daha sonra iştirakçılar mərkəzin tədris otaqları və texnoloji infrastrukturu ilə tanış olublar. Onlara “Engineering zone”, “Kids zone”, “Science zone”, “Work zone”, “Robotics zone”, “Art zone” və “Drone zone” bölmələrində yaradılmış imkanlar barədə məlumat verilib.
Maarifləndirici tədbir tələbələrin innovativ tədris metodları, müasir texnologiyalar və nəzəri biliklərin praktik bacarıqlara çevrilməsi imkanları haqqında məlumatlarının genişləndirilməsinə xidmət edib.
Qeyd edək ki, Mingəçevir Dövlət Universiteti tələbələrin müasir əmək bazarının tələblərinə uyğun bilik və bacarıqlara yiyələnməsi, eləcə də innovativ öyrənmə imkanlarının genişləndirilməsi istiqamətində fəaliyyətini davam etdirir.