Azərbaycan Dillər Universitetində tədrisin keyfiyyətinin artırılması, tələbələrin dil biliklərinin və interaktiv təlim metodlarının inkişaf etdirilməsi məqsədilə innovativ dərslərin təşkilinə xüsusi diqqət yetirilir.
“Tehsil365” xəbər verir ki, bu çərçivədə İngilis və fransız dilləri fakültəsi nəzdində fəaliyyət göstərən İngilis dilinin qrammatikası kafedrasının baş müəllimi Leyla Süleymanova və müəllim Səbinə Vəliyeva ABŞ səfirliyinin Fulbrayt Təqaüd Proqramının məzunu, English Teaching Assistant Michael Sipper ilə birgə növbəti müştərək dərsi keçiriblər.
İngilis və alman dilləri fakültəsinin 202A və İngilis və fransız dilləri fakültəsinin 215B qruplarının tələbələrinin iştirakı ilə “Kommunikativ qrammatika” fənni üzrə keçirilən dərs interaktiv formatda təşkil olunub.
Dərs iki fərqli fakültənin tələbələrini vahid təlim mühitində birləşdirib. Dərsin birinci hissəsində “The Conditional Mood”, ikinci hissəsində isə “The Sentence. The kinds and types of the Simple Sentence” mövzuları geniş şəkildə təqdim olunub.
Dərs müddətində nəzəri məlumatlar real kommunikativ situasiyalar və praktik tapşırıqlarla əlaqələndirilib. İnteqrasiya olunmuş tapşırıqlar vasitəsilə tələbələrin dörd əsas dil bacarığı - dinləmə, danışma, oxu və yazı paralel şəkildə inkişaf etdirilib.
Michael Sipperin canlı dil daşıyıcısı kimi dərsdə iştirakı tələbələrin dil mühitinə daha yaxından inteqrasiya olunmasına və qrammatik strukturları şifahi nitqdə daha sərbəst və təbii şəkildə tətbiq etmələrinə şərait yaradıb. Qarşılıqlı diskussiya, qrup işləri və sual-cavab formatında keçirilən dərs tələbələr tərəfindən böyük maraqla qarşılanıb.