Bakı Ekspo Mərkəzində keçirilən XII Bakı Beynəlxalq Kitab Sərgisi (Baku International Book Fair 2026) çərçivəsində Rusiyanın “Alatoran” nəşriyyatı tərəfindən Azərbaycan dilinə tərcümə olunmuş rusiyalı yazıçıların kitablarının təqdimatı keçirilib.
“Tehsil365” xəbər verir ki, Tədbirdə Azərbaycan Dillər Universitetinin (ADU) Rusiyaşünaslıq Mərkəzinin müdiri Diana Hüseynzadə, Mərkəzin aparıcı elmi işçisi Tamilla Naibova və universitetin tələbələri iştirak ediblər.
Bakı Ekspo Mərkəzinin “Nizami Gəncəvi” təqdimat zonasında keçirilən görüşdə müasir rus ədəbiyyatının Azərbaycan dilinə tərcümə edilmiş nümunələri oxuculara təqdim olunub. Təqdim edilən əsərlər arasında İldar Abuzərovun “Sevgisizlik haqqında” (“Об отсутствии любви”), Alyona Kərimovanın “Pelekanın qayıdışı” (“Возвращение пеликана”) və Sergey Şarqunovun “Daxili çevrə” (“Внутренний круг”) kitabları yer alıb.
Rusiyaşünaslıq Mərkəzinin əməkdaşları və ADU-nun tələbələri təqdim olunan əsərlərə böyük maraq göstərərək müzakirələrdə fəal iştirak edib, müəlliflərə onların yaradıcılığı, ədəbi fəaliyyəti və təqdim edilən kitabların xüsusiyyətləri ilə bağlı suallar ünvanlayıblar.
Görüş tələbələrin müasir rus ədəbiyyatı ilə daha yaxından tanış olmaları, yazıçıların yaradıcılığı haqqında ətraflı məlumat əldə etmələri, həmçinin bədii tərcümənin Azərbaycan və Rusiya arasında mədəni dialoqun inkişafındakı rolunun müzakirəsi baxımından əhəmiyyətli olub.
Tədbirin sonunda iştirakçılara müəlliflərin avtoqrafları ilə imzalanmış kitablar xatirə olaraq hədiyyə edilib.