Xəzər Universitetinin Coğrafiya müəllimliyi və Coğrafiya və tarix müəllimliyi ixtisaslarında təhsil alan tələbələr 2026-cı il oktyabrın 26-da Qudyalçayın Quba rayonu ərazisindən keçən hissəsində sahə səfərində olublar.
“Tehsil365” xəbər verir ki, məqsəd tələbələrin su resursları, onların səmərəli istifadəsi və inteqrasiyalı idarə olunması ilə bağlı nəzəri biliklərini praktiki müşahidələrlə zənginləşdirmək olub.
Sahə səfəri zamanı onlar çay ekosisteminin xüsusiyyətləri, səth sularının əhəmiyyəti, su ehtiyatlarının formalaşmasına təsir edən təbii amillər və su resurslarının ətraf mühitlə qarşılıqlı əlaqəsi haqqında məlumatlar əldə ediblər. Eyni zamanda, su ehtiyatlarının qorunması, çirklənmənin qarşısının alınması, suyun məişətdə, kənd təsərrüfatında və digər sahələrdə səmərəli istifadəsi, eləcə də su resurslarının davamlı idarə olunmasının əhəmiyyəti müzakirə edilib.
Tələbələr su resurslarının inteqrasiyalı idarəçiliyinin mahiyyəti ilə tanış olaraq, bu prosesdə ekoloji, sosial və iqtisadi amillərin nəzərə alınmasının, su istifadəçiləri arasında əməkdaşlığın və su ehtiyatlarının gələcək nəsillər üçün qorunmasının vacibliyini də öyrəniblər. Həmçinin, iqlim dəyişmələrinin, quraqlıq və daşqın kimi hidroloji hadisələrin su ehtiyatlarına mümkün təsirləri, çay hövzələrinin kompleks idarə olunmasının əhəmiyyəti barədə biliklərini genişləndiriblər.
Sahə müşahidələri tələbələrə auditoriyada əldə etdikləri bilikləri real coğrafi mühitdə tətbiq etmək, çayın təbii xüsusiyyətlərini daha yaxından öyrənmək və su resurslarının idarə olunması ilə bağlı ekoloji problemlərə praktik yanaşmaq imkanı yaradıb.
Bu cür sahə səfərləri gələcək coğrafiya müəllimlərinin ekoloji biliklərinin artırılması, praktiki bacarıqlarının inkişaf etdirilməsi və su resurslarının davamlı idarə olunması sahəsində məlumatlılığının gücləndirilməsi baxımından mühüm əhəmiyyət daşıyır.