Xəzər Universitetinin Psixologiya departamentinin əməkdaşı, Xəzər Psixoloji Xidmət Mərkəzinin psixoloq-psixoterapevti Mirsadiq Muxtarov 2026-cı il oktyabrın 26-da “Azərbaycan müəllimi” xəbər saytına məktəbdə sakit davranan şagirdlərin psixoloji vəziyyəti və bu davranışların mümkün səbəbləri barədə fikirlərini bölüşüb.
“Tehsil365” xəbər verir ki, psixoloq bildirib ki, dərs zamanı diqqəti cəlb etməyən və müəllimlər üçün çətinlik yaratmayan şagirdi avtomatik olaraq problemsiz hesab etmək düzgün deyil. Onun sözlərinə görə, sakitlik bəzi uşaqların fərdi xüsusiyyəti olsa da, müəyyən hallarda narahatlıq, qorxu və özünü ifadə etməkdə çətinliklərlə əlaqəli ola bilər. Mirsadiq Muxtarov qeyd edib ki, əsas məsələ uşağın sakitliyinin səbəbini və onun həyatına təsirini anlamaqdır.
Mütəxəssis vurğulayıb ki, şagirdin fikirlərini ifadə etməkdən çəkinməsi və sosial ünsiyyətdən yayınması davamlı xarakter aldıqda diqqətlə qiymətləndirilməlidir. Onun sözlərinə görə, bullinq, ailədaxili mübahisələr, emosional dəstəyin azlığı və özünü başqaları ilə müqayisəetmə uşağın davranışına təsir göstərə bilər. Əvvəllər ünsiyyətcil olan uşağın qəfil sakitləşməsi də emosional çətinliklərin göstəricisi ola bilər.
Mirsadiq Muxtarov qeyd edib ki, uşağa təzyiq göstərmək və onu başqaları ilə müqayisə etmək əvəzinə, özünü təhlükəsiz hiss edə biləcəyi mühit yaratmaq vacibdir. Əgər bu davranışlar uzun müddət davam edir, uşağın təhsilinə və sosial münasibətlərinə mənfi təsir göstərirsə, məktəb psixoloquna və ya uşaq psixoloquna müraciət etmək məqsədəuyğundur.