27 oktyabr 2026-cı il tarixində Dövlət İmtahan Mərkəzində (DİM) beynəlxalq nəşriyyat və təhsil resursları sahəsində fəaliyyət göstərən McGraw Hill təşkilatının nümayəndələri – professor Hassam Hamdy və mühasib Nuri Karaca ilə görüş keçirilib.
“Tehsil365” xəbər verir ki, bu haqda Dövlət İmtahan Mərkəzində (DİM) öz rəsmi hesabında paylaşım edib.
Bildirilib ki, DİM-in İdarə Heyətinin sədri Məleykə Abbaszadənin iştirakı ilə keçirilən görüşdə tibb təhsili üzrə qiymətləndirmə sahəsində mövcud təcrübə, tibb istiqaməti üzrə təhsil almaq istəyən abituriyentlərin qəbul prosesinin təşkili, onların keçdiyi mərhələlər, həmçinin rezidentura səviyyəsinə qəbul məsələləri müzakirə olunub. Eyni zamanda, ali təhsil müəssisələrinə qəbul olunduqdan sonra tələbələrin tibbi bilik və bacarıqlarının qiymətləndirilməsi, onların nəzəri hazırlıq səviyyəsinin və praktiki səriştələrinin müəyyənləşdirilməsi, eləcə də bu sahədə müasir qiymətləndirmə yanaşmalarının tətbiqi imkanları ətrafında fikir mübadiləsi aparılıb.
Görüş çərçivəsində McGraw Hill tərəfindən təqdim olunan AccessMedicine rəqəmsal tibbi təhsil platforması ilə tanışlıq olub. Platformanın funksionallığı, təqdim etdiyi tədris resursları və onun tibb sahəsində bilik və bacarıqların qiymətləndirilməsi prosesində tətbiqi imkanları müzakirə edilib. Xüsusilə, müasir rəqəmsal resurslardan istifadə etməklə qiymətləndirmə prosesinin təkmilləşdirilməsi və onun praktiki tərəfinin gücləndirilməsi məsələlərinə diqqət yetirilib.
Görüş zamanı tibb təhsili üzrə qiymətləndirmənin müasir tələblərə uyğun təkmilləşdirilməsi, beynəlxalq təcrübənin öyrənilməsi və innovativ yanaşmaların tətbiqi imkanları, eləcə də gələcək əməkdaşlığın mümkün istiqamətləri müzakirə olunub. Bu istiqamətlərə tibb sahəsində bilik və bacarıqların qiymətləndirilməsi üzrə yanaşmaların inkişaf etdirilməsi, qiymətləndirmə alətləri ilə texnoloji platformaların inteqrasiyası, həmçinin təcrübə və ekspert mübadiləsi imkanları daxil olub.