"Alimin elmi dəyəri onun harada işləməsi ilə ölçülməməlidir".
“Tehsil365” xəbər verir ki bu sözləri AzEdu.az-a açıqlamasında Rusiya və Türkiyənin iqtisad elmləri doktoru, professor Zahid Məmmədov qeyd edib.
O, xarici universitetlərdə azərbaycanlıların vəzifələrə təyin olunması ilə bağlı xəbərlərin təqdimatına münasibət bildirib:
"Xarici universitetlərdə çalışan azərbaycanlı alimlərin uğurları təqdirəlayiqdir. Bununla yanaşı, akademik nailiyyətlərin qiymətləndirilməsində universitetin adına deyil, vəzifənin mahiyyətinə, elmi fəaliyyətin məzmununa və əldə olunan nəticələrə diqqət yetirilməlidir.Akademik vəzifəyə təyin olunmaqla elmi nailiyyət eyni anlayışlar deyil. Bu səbəbdən belə xəbərlərdə vəzifələrin funksiyalarının düzgün izah edilməsi və elmi nəticələrin obyektiv qiymətləndirilməsi vacibdir.
Azərbaycanda universitetlərdə və elmi-tədqiqat institutlarında çalışan alimlərin fəaliyyəti də ictimaiyyətə daha geniş təqdim olunmalıdır. Elmi məktəblərin formalaşdırılması, gənc tədqiqatçıların yetişdirilməsi, yeni biliklərin yaradılması və ölkənin elmi potensialının gücləndirilməsi mühüm akademik töhfələrdir.
Əsas məqsədlərdən biri Azərbaycanda elmi fəaliyyət üçün əlverişli şəraitin daha da inkişaf etdirilməsi, alimlərin peşəkar potensialının reallaşdırılması və beynəlxalq elmi əməkdaşlığın genişləndirilməsidir. Xaricdəki fərdi akademik uğurlar və ölkə daxilində elmin institusional inkişafı bir-birini tamamlamalıdır. Elmi nailiyyətlərin obyektiv və tarazlı işıqlandırılması həm milli elmi potensialın tanıdılmasına, həm də cəmiyyətdə elmə marağın artırılmasına xidmət edə bilər".