“Cəfər Cabbarlı adına Respublika Gənclər Kitabxanası Azərbaycan ədəbiyyatının görkəmli nümayəndələrinin həyat və yaradıcılığının təbliği, milli-mənəvi irsin qorunması və müasir informasiya texnologiyaları vasitəsilə oxuculara çatdırılması istiqamətində fəaliyyətini davam etdirir. Bu məqsədlə kitabxanada görkəmli dramaturq, ictimai xadim, Xalq yazıçısı, akademik Mirzə İbrahimovun anadan olmasının 115 illik yubileyinə həsr olunmuş elektron məlumat bazası hazırlanıb.”
“Tehsil365” xəbər verir ki,kitabxanadan bildirilib ki, elektron bazada Azərbaycan ədəbiyyatında özünəməxsus mövqeyə malik olan Mirzə İbrahimovun yazıçı, dramaturq, ədəbiyyatşünas, publisist və ictimai xadim kimi milli mədəniyyətimizin inkişafına verdiyi töhfələrdən bəhs olunur.
Kitabxana əməkdaşları tərəfindən hazırlanan bazada professor Şirindil Alişanlının “Akademik Mirzə İbrahimov”, professor Bədirxan Əhmədlinin “Mirzə İbrahimov: “Ey mənim xalqım, ey mənim ümidim və pənahım” Azərbaycan dili uğrunda mücadiləsi üzərinə”, Azərbaycan Milli Elmlər Akademiyasının müxbir üzvü Misir Mərdanovun “Kimində rəğbət, kimində heyrət, kimində həsəd, ancaq hamıda hörmət doğuran fenomen - Mirzə İbrahimov” adlı məqalələrinin tam mətni təqdim edilir.
Kitabxananın rəsmi saytında yerləşdirilən bazanın “Xronologiya” bölməsi Mirzə İbrahimovun həyat və fəaliyyətinin əsas mərhələlərini ardıcıllıqla izləməyə imkan verir. “Həyat və fəaliyyəti” və “Mirzə İbrahimov: ədəbi-estetik görüşləri” kimi bölmələrdə ədibin zəngin yaradıcılıq yolu, ədəbi və ictimai fəaliyyəti, layiq görüldüyü təltif və mükafatlar haqqında məlumatlar təqdim edilir.
Elektron bazada Mirzə İbrahimovun müəllifi olduğu və Azərbaycan, alman, Belarus, eston, Çin, fars, benqal, fransız, bolqar dillərində nəşr edilən kitablarının, dövri mətbuat məqalələrinin, redaktə etdiyi, “Ön söz” və rəy yazdığı nəşrlərin siyahısı yer alır.
Bazada “Xatirəsinin əbədiləşdirilməsi” “Filmoqrafiya”, “Tərcümələr”, “İzonəşrlər”, “Notlar”, “Virtual sərgi” və “Foto və videoqalereya” kimi bölmələr də mövcuddur.
Elektron məlumat bazası görkəmli yazıçının həyat və yaradıcılığı haqqında məlumatların sistemli şəkildə təqdim edilməsi, onun ədəbi irsinin geniş oxucu auditoriyasına çatdırılması məqsədilə hazırlanıb.