Oktyabrın 22-də Azərbaycan Dillər Universitetində (ADU) Qərb ölkələri üzrə Regionşünaslıq kafedrasının təşkilatçılığı ilə “Hacı Zeynalabdin Tağıyev və memarlıq irsi” mövzusunda tədbir keçirilib. Tədbirdə kafedra müdirləri və tələbələr iştirak ediblər.
“Tehsil365” xəbər verir ki, Qərb ölkələri üzrə Regionşünaslıq kafedrasının müdiri, professor Sevdagül Əliyeva tədbiri açıq elan edərək Bakının məskunlaşması, şəhərin tarixi, keçmiş dövrlərdə Bakıda mövcud vəziyyət, neft partlayışının baş verməsi və Bakı milyonçularının fəaliyyəti haqqında ətraflı məlumat verib. Sevdagül Əliyeva Hacı Zeynalabdin Tağıyevin oxuma-yazma bilməməsinə baxmayaraq, təhsilə verdiyi önəmi və bu istiqamətdə atdığı addımların əhəmiyyətini vurğulayıb.
Daha sonra Qərb ölkələri üzrə Regionşünaslıq kafedrasının müəllimi Əminə İmanzadə Hacı Zeynalabdin Tağıyevin tikdirdiyi binalar haqqında məlumat verib. O, Bakı Qızlar Məktəbi, toxuculuq sənayesi, Tağıyevin teatr binası və digər tikililərin memarlıq quruluşu, tikilmə prosesi və dövrün vəziyyəti barədə məlumatları diqqətə çatdırıb. Əminə İmanzadə Tağıyevin fəaliyyətinin konkret bir sahə ilə məhdudlaşmadığını, cəmiyyətin bütün təbəqələrinin ehtiyaclarının ödənilməsinə yönəldiyini bildirib.
Şərq ölkələri üzrə Regionşünaslıq kafedrasının müəllimi, eyni zamanda Milli Azərbaycan Tarixi Muzeyinin əməkdaşı Turan Qasımova isə Hacı Zeynalabdin Tağıyevin ev muzeyi haqqında məlumat verib. O, muzeyin otaqları, dekorasiyası və onların mənaları barədə geniş təqdimatla çıxış edib. Turan Qasımova Tağıyevin evinin Şərq zalı, Avropa zalı, iş zalı və digər hissələrinin memarlıq üslublarını izah edərək bu tikilinin yalnız möhtəşəm memarlıq əsəri deyil, həm də dövlətçilik tariximizin formalaşmasında mühüm məkan olduğunu bildirib.