Oktyabrın 27-də Azərbaycan Milli Elmlər Akademiyasında (AMEA) VII Ümumdünya Mədəniyyətlərarası Dialoq Forumu çərçivəsində “Parçalanmış dünyada humanitar elmlərin missiyası” mövzusunda Akademik Forum keçirilib.
“Tehsil365” xəbər verir ki, tədbir UNESCO-nun Dinlərarası Dialoq və Mədəniyyətlərarası Anlaşma üzrə UNITWIN Şəbəkəsinin Akademik Forumu çərçivəsində təşkil olunub.
Forumun açılışında AMEA-nın prezidenti, akademik İsa Həbibbəyli, elm və təhsil nazirinin müavini Firudin Qurbanov, mədəniyyət nazirinin müavini Səadət Yusifova, eləcə də xarici ölkələrdən olan alimlər və beynəlxalq təşkilatların nümayəndələri iştirak ediblər.
Çıxışlarda humanitar elmlərin müasir dünyada qarşılıqlı anlaşmanın gücləndirilməsi, mədəni müxtəlifliyin qorunması və davamlı sülhün təşviqindəki roluna diqqət yetirilib.
Elm və təhsil nazirinin müavini Firudin Qurbanov bildirib ki, təhsil yalnız bilik ötürülməsi ilə məhdudlaşmır, eyni zamanda müstəqil və tənqidi düşünmək, məlumatları təhlil etmək və fərqli mövqeləri qiymətləndirmək bacarıqlarını formalaşdırır.
Tədbirdə rəqəmsal texnologiyaların və süni intellektin mədəniyyətlərarası dialoqa təsiri də müzakirə olunub. İştirakçılar elmi əməkdaşlığın genişləndirilməsinin, ortaq dəyərlərin müəyyənləşdirilməsinin və mədəni irsin qorunmasının əhəmiyyətini vurğulayıblar.
Forumun davamında “Mədəniyyətlərarası anlaşma və humanitar elmlərin missiyası” mövzusunda panel iclası keçirilib. Paneldə fəlsəfə, tarix, dilçilik, folklor və süni intellektlə bağlı mövzularda məruzələr dinlənilib.