“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı Vətən müharibəsi şəhidi Saleh Əliyevin əziz xatirəsinə həsr olunacaq.
"Tehsil365" xəbər verir ki, buraxılış oktyabrın 30-da saat 18:00-da “Tehsil365” İnformasiya Agentliyinin YouTube kanalında yayımlanacaq. Proqramın aparıcısı agentliyin təşkil etdiyi birinci “Könüllü müxbir” layihəsində könüllü müxbir kimi fəaliyyət göstərən Züleyxa Allahverdiyeva olacaq.
Saleh Əliyev 1992-ci il avqustun 18-də Bakı şəhərinin Sabunçu rayonunun Zabrat qəsəbəsində anadan olub. Azərbaycan Ordusunun əsgəri olan Saleh Əliyev 2020-ci il sentyabrın 27-də başlayan Vətən müharibəsində iştirak edib. O, Cəbrayıl və Füzuli rayonlarının azadlığı uğrunda gedən döyüşlərdə vuruşub və oktyabrın 15-də Füzuli istiqamətində gedən döyüşlər zamanı şəhid olub.
Şəhid Saleh Əliyev hərbi xidmət zamanı göstərdiyi igidlik və şücaətə görə ölümündən sonra bir sıra dövlət təltiflərinə layiq görülüb. O, Azərbaycan Prezidenti İlham Əliyevin müvafiq sərəncamları ilə “Vətən uğrunda”, “Xocavəndin azad olunmasına görə” və “Füzulinin azad olunmasına görə” medalları ilə təltif edilib. Həmçinin Saleh Əliyev 3-cü dərəcəli “Vətənə xidmətə görə” ordeninə layiq görülüb.
“Şəhidin səsi” proqramı şəhidlərimizin həyat yolunun, qəhrəmanlığının və Vətən uğrunda göstərdikləri fədakarlığın ictimaiyyətə çatdırılmasını, onların əziz xatirəsinin yaşadılmasını qarşıya məqsəd qoyur.
Saleh Əliyevin həyat və döyüş yolundan bəhs edən növbəti buraxılışı oktyabrın 30-da saat 18:00-da “Tehsil365” İnformasiya Agentliyinin YouTube kanalında izləyə bilərsiniz.