Sumqayıt Dövlət Universiteti (SDU) ilə Azərbaycan Respublikası Elm və Təhsil Nazirliyinin Coğrafiya İnstitutu arasında elm, təhsil, innovasiya və elmi-tədqiqat sahələrində əməkdaşlığın inkişaf etdirilməsini nəzərdə tutan memorandum imzalanıb.
“Tehsil365“ xəbər verir ki, memorandum tərəflər arasında birgə elmi layihələrin həyata keçirilməsini, təcrübə mübadiləsini və gənc tədqiqatçıların elmi potensialının inkişaf etdirilməsini əhatə edir.
Görüşdə SDU-nun rektoru, professor Nurəli Yusifbəyli əməkdaşlığın birgə elmi-tədqiqat fəaliyyətinin genişləndirilməsi və yüksəkixtisaslı kadr hazırlığının keyfiyyətinin artırılması baxımından əhəmiyyətini vurğulayıb.
Coğrafiya İnstitutunun direktoru, dosent Zaur İmrani isə memorandumun müasir coğrafi texnologiyaların tətbiqi, elmi təcrübə mübadiləsinin genişləndirilməsi və aktual ekoloji problemlərin araşdırılması üçün yeni imkanlar yaradacağını bildirib.
Əməkdaşlıq çərçivəsində Coğrafi İnformasiya Sistemləri (CİS) və məsafədən zondlama texnologiyalarının tətbiqi, laboratoriya və çöl tədqiqatlarının aparılması, tələbə, magistrant və doktorantların elmi fəaliyyətə cəlb edilməsi nəzərdə tutulur.
Bundan əlavə, professor-müəllim heyəti və tədqiqatçılar üçün təlim və ixtisasartırma tədbirlərinin təşkili, birgə elmi nəşrlərin hazırlanması və qrant layihələrinin həyata keçirilməsi planlaşdırılır.
Qeyd edək ki, əməkdaşlığın elmi potensialın birləşdirilməsinə, tətbiqi tədqiqatların genişləndirilməsinə və regionun ekoloji problemlərinin elmi əsaslarla öyrənilməsinə töhfə verəcəyi gözlənilir.