“Azərbaycanda hal-hazırda universitetlərdə sosiologiya təhsili istiqamətində, təəssüf ki, əsasən nəzəriyyələrə daha çox fokus verilir.”
Bu sözləri “Tehsil365” e müsahibəsində sosioloq Yusif Nəbiyev bildirmişdir.
— Universitetlərdə sosiologiya nəzəriyyələrinə, yoxsa praktiki tədqiqatlara daha çox üstünlük verilir?
“Azərbaycanda hal-hazırda universitetlərdə sosiologiya təhsili istiqamətində, təəssüf ki, əsasən nəzəriyyələrə daha çox fokus verilir. Azərbaycanda bir az bu işin praktiki tətbiqi o qədər də qənaətbəxş şəkildə deyil. Amma mən düşünürəm ki, sosiologiya təhsilində əsasən bu kimi məsələlərdə, məncə, praktiki tərəfə daha çox üstünlük verilməlidir.
Sadəcə, onun səbəblərindən biri odur ki, Azərbaycanda sosial araşdırma mədəniyyəti, ümumiyyətlə, think tank deyilən düşüncə qurumları, beyin mərkəzləri yoxdur deyə, Azərbaycanda sosioloqlara da əslində bir baxımdan o qədər də ehtiyac yoxdur. Bilirsiniz ki, sosiologiya istiqamətində təhsil alan insanların əmək bazarında da özlərini doğrulda bilmələri, özləri üçün layiqli yer tapa bilmələri kifayət qədər çətindir. Ona görə də, yəni əmək bazarında ehtiyac yoxdursa, avtomatik olaraq bu təhsilin universitetdəki keyfiyyətinə də o qədər də diqqət ayrılmır. Gərək əmək bazarında bir ixtisasa ciddi ehtiyac yaransın ki, onun təhsil bazasında təkmilləşdirilməsinə, inkişaf etdirilməsinə diqqət və enerji ayrılsın.”
— Sosiologiya təhsilində hansı dəyişikliklərə ehtiyac var?
"Düşünürəm ki, sosiologiya təhsilində hansı dəyişikliklərə ehtiyac var məsələsinə gəldikdə, hər şeydən əlavə, sosioloqlar üçün ümumiyyətlə ölkədə ciddi iş imkanları təyin olunmalı, təşkil olunmalıdır. Sosioloqlar, sosiologiya ixtisasında oxuyan tələbələr ən azından bilməlidirlər ki, onların qarşısında hansı iş imkanları var və onlarda hansı iş bacarıqları tələb olunur ki, o yöndə özlərini inkişaf etdirə bilsinlər”
— Tələbələrə tənqidi və analitik düşünmə bacarıqları kifayət qədər aşılanırmı?
“Amma sırf universitet dövründə isə ən azından tələbələr üçün müstəqil araşdırmalara icazə verilməsi, statistik məlumatlara çıxışların təmin olunması, bu statistik datalardan çıxış edərək öz müstəqil analitik yazılarını yazmağa sosioloqlara şərait yaradılmasına düşünürəm ki, hal-hazırda ciddi ehtiyac var.”