Azərbaycanda dövlət xidmətlərinin göstərilməsində süni intellekt texnologiyalarından istifadənin genişləndirilməsi planlaşdırılır. Bu məqsədlə Rəqəmsal İnkişaf və Nəqliyyat Nazirliyi ilə “Wonderful” şirkəti arasında Anlaşma Memorandumu imzalanıb.
“Tehsil365” xəbər verir ki, memorandum süni intellekt həllərinin dövlət qurumlarında tətbiqi imkanlarının araşdırılmasını və rəqəmsal xidmətlərin təkmilləşdirilməsini nəzərdə tutur.
Əməkdaşlıq çərçivəsində “Wonderful” platforması əsasında dövlət qurumları, vətəndaşlar və biznes subyektləri üçün vahid süni intellekt platformasının yaradılması planlaşdırılır. Platformanın Azərbaycanın “Hökumət buludu”nda (G-Cloud) yerləşdirilməsi nəzərdə tutulur.
Bakıda keçirilən imzalanma mərasimində rəqəmsal inkişaf və nəqliyyat nazirinin müavini Rəşad Həsənov, İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanov, eləcə də “Wonderful” şirkətinin həmtəsisçisi və baş icraçı direktoru Bar Vinkler iştirak ediblər.
Tədbir çərçivəsində süni intellekt texnologiyalarının tətbiqi ilə bağlı dəyirmi masa da təşkil olunub. Burada yaşayış yeri ilə bağlı müraciətlərin yoxlanılması, idxal sənədlərinin təsdiqlənməsi, “myGov” xidmətləri üzrə səsli dəstək və ictimai nəqliyyat sərnişinlərinə yardım kimi həllər nümayiş etdirilib.
Tərəflər yerli mütəxəssislərin hazırlanması, bilik və təcrübə mübadiləsi, eləcə də Azərbaycanda yerli komandanın formalaşdırılması istiqamətində əməkdaşlıq etməyi planlaşdırırlar.
Qeyd edək ki, bu əməkdaşlıq Azərbaycanın 2025–2028-ci illər üçün Süni İntellekt Strategiyasının və rəqəmsal inkişaf sahəsində müəyyən edilmiş prioritetlərin həyata keçirilməsinə xidmət edir.