Oktyabrın 30-da Azərbaycan Dillər Universitetində (ADU) "Germanistikanın yeni dövrü: Müasir tədqiqat meyilləri, rəqəmsal yanaşmalar və disiplinlərarası perspektivlər" mövzusunda elmi seminar keçirilib.
“Tehsil365” xəbər verir ki, elmi seminarın moderatoru İngilis dilinin leksikologiyası kafedrasının f.f.d., baş müəllimi Dürrə Həşimova Germanistikanın innovativ və rəqəmsal perspektivləri mövzusunda çıxış edib.
Tədbirdə İngilis və alman, İngilis və fransız dilləri fakültəsinin dekanları dos. N.E. Camalzadə, dos. V.Z. Babayeva, İngilis dilinin leksikologiyası kafedrasının müdiri dos. M.Ə. Hüseynova, Alman dilinin leksikologiyası və üslubiyyatı kafedrasının müdiri dos. X.S. Əsgərova, İngilis dilinin fonetikası kafedrasının müdiri dos. X.Ə. Qocayeva, Serbiya Mərkəzinin müdiri dos. L.Ç. Məcidova, Təlim və metodologiya mərkəzinin müdiri b.m. M.A. Bağırova və kafedranın əməkdaşları iştirak ediblər.
Seminarın əsas məqsədi rəqəmsallaşma, qloballaşma və transmilli miqrasiya prosesləri fonunda germanistika elminin keçdiyi transformasiyanı təhlil etmək, eləcə də müasir tədqiqat metodlarını universitetin elmi-tədris mühitinə inteqrasiya etməkdən ibarət olub.
Məruzədə klassik filoloji yanaşmalardan rəqəmsal və interkultural germanistikaya keçidin zəruriliyi vurğulanıb. Qeyd olunub ki, müasir dövrdə germanistika sadəcə bədii mətnlərin analizi və ya qrammatik qaydaların öyrənilməsi ilə çərçivələnə bilməz; bu sahə artıq koqnitiv dilçilik, sosiolinqvistika və rəqəmsal humanitar elmlərlə (Digital Humanities) sintez olunan dinamik bir fənlərarası müstəviyə keçib.
Məruzədə xüsusilə aşağıdakı strateji istiqamətlər önə çəkilib:
- Areal və Disiplinlərarası Yanaşma: Germanistikanın dar "alman dilçiliyi" çərçivəsindən çıxaraq bütün german dillərinin ümumi təkamül qanunauyğunluqlarını araşdıran areal elminə çevrilməsi;
- Rəqəmsal Germanistika və Korpus Dilçiliyi: Süni intellekt (AI), Böyük Dil Modelləri (LLM) və korpus proqramlarının (AntConc, Sketch Engine, NooJ) filoloqlar üçün əvəzolunmaz empirik alətə dönüşməsi;
- ADU-da Elmi İnnovasiyalar: Universitet bazasında rəqəmsal german-Azərbaycan paralel tərcümə korpuslarının yaradılması və tədqiqatların müasir fənlərarası paradiqmalara adaptasiyası.
Seminar müzakirələrlə yekunlaşıb.