Azərbaycanda innovasiya ekosisteminin inkişafı, startapların dəstəklənməsi və texnoloji sahibkarlığın genişləndirilməsi istiqamətində işlər davam etdirilir.
“Tehsil365” xəbər verir ki, bunu iqtisadiyyat nazirinin müavini Azər Bayramov “Startup School 4: Five Continents – 500 Startups” qlobal innovasiya proqramının yekun tədbiri – “Demo Day”də çıxışı zamanı bildirib.
Nazir müavini qeyd edib ki, startaplar yeni müəssisələrin yaradılmasına, innovativ məhsul və xidmətlərin hazırlanmasına, eləcə də iqtisadiyyatın rəqabətqabiliyyətliliyinin artırılmasına mühüm töhfə verir.
Onun sözlərinə görə, Azərbaycanda innovasiya mühitinin gücləndirilməsi üçün beynəlxalq təcrübənin öyrənilməsi, investorların cəlb edilməsi və gənc sahibkarların dəstəklənməsi xüsusi əhəmiyyət daşıyır.
Azər Bayramov bildirib ki, İspaniyanın nüfuzlu IE Universiteti ilə əməkdaşlıq çərçivəsində Bakıda yaradılan Liderlik və İnnovasiya Mərkəzi ölkənin innovasiya potensialının inkişafına xidmət edəcək.
O, həmçinin STEAM İnnovasiya Kampusunun elm, təhsil və sahibkarlıq arasında əlaqələrin gücləndirilməsində mühüm rol oynayacağını vurğulayıb.
Nazir müavini əlavə edib ki, proqramlaşdırma, süni intellekt, məlumatların təhlili və sahibkarlıq üzrə təşkil olunan təlimlər insan kapitalının inkişafına və yeni texnologiyalara yiyələnmiş mütəxəssislərin hazırlanmasına imkan yaradır.