Azərbaycanın Rəqəmsal İnkişaf və Nəqliyyat Nazirliyi ilə Niderlandın “Wonderful” şirkəti arasında süni intellekt həlləri və əlaqəli rəqəmsal texnologiyalar sahəsində əməkdaşlığa dair Anlaşma Memorandumu imzalanıb.
“Tehsil365” “Report”a istinadən xəbər verir ki, memorandum süni intellekt həllərinin “Wonderful” platforması əsasında nazirliklərdə, dövlət qurumlarında və dövlət müəssisələrində tətbiqi imkanlarının araşdırılmasını nəzərdə tutur.
Əsas məqsəd dövlət xidmətlərinin göstərilməsini daha sürətli və əlçatan etmək, onları vətəndaşların və biznes subyektlərinin ehtiyaclarına uyğunlaşdırmaq, eləcə də dövlət qurumlarının fəaliyyətinin səmərəliliyini artırmaqdır.
Tərəflər vətəndaşlara, biznes subyektlərinə və dövlət qurumlarına xidmət göstərəcək vahid süni intellekt platformasının yaradılmasını planlaşdırırlar. Platformanın Azərbaycanın “Hökumət buludu”nda (G-Cloud) yerləşdirilməsi nəzərdə tutulur.
Bakıda keçirilən imzalanma mərasimində rəqəmsal inkişaf və nəqliyyat nazirinin müavini Rəşad Həsənov, İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanov, həmçinin “Wonderful” şirkətinin həmtəsisçisi və baş icraçı direktoru Bar Vinklerin rəhbərlik etdiyi nümayəndə heyəti iştirak edib.
Rəşad Həsənov bildirib ki, süni intellektin əsas dəyəri dövlət idarəçiliyinin səmərəliliyini artırmaq və insanların dövlət xidmətlərinə çıxışını yaxşılaşdırmaq imkanları ilə bağlıdır.
Memorandum çərçivəsində yerli mütəxəssislərin bilik və bacarıqlarının artırılması, təcrübə mübadiləsi və Azərbaycanda süni intellekt sahəsində yerli potensialın gücləndirilməsi də nəzərdə tutulur.
Bildirilib ki, “Wonderful” şirkəti Azərbaycanda yerli hüquqi şəxs yaratmaq, yerli mütəxəssisləri işə cəlb etmək və azərbaycanlı mütəxəssislərə təlimlər keçirmək niyyətindədir.
Qeyd edək ki, əməkdaşlıq Azərbaycanın 2025–2028-ci illər üçün Süni İntellekt Strategiyasının və 2026–2028-ci illər üzrə Rəqəmsal inkişafın sürətləndirilməsi üzrə Fəaliyyət Planının məqsədlərinə uyğundur.