Azərbaycan Respublikası Elm və Təhsil Nazirliyinin Dövlət Proqramı İdarəetmə Qrupunun (DPİQ) rəhbəri Dr. Qədir Xəlilov Özbəkistanın Səmərqənd şəhərində təşkil olunan Qlobal İstedadlar Forumunda məruzəçi qismində iştirak edib. "Uzbekistan's Club" və Özbəkistan Respublikasının Prezidenti yanında “El-yurt umidi” Fondunun birgə təşkilatçılığı ilə tarixi "Do'stmatboy" mədrəsəsində keçirilən forumda ABŞ, Avropa, Asiya-Sakit okean regionu və qonşu ölkələrdən 100-dən çox beynəlxalq ekspert, dövlət xadimi və təhsil liderləri bir araya gəliblər.
“Tehsil365” xəbər verir ki, tədbirdə məruzə ilə çıxış edən Qədir Xəlilov Azərbaycan Respublikasının Prezidenti cənab İlham Əliyevin neft kapitalının insan kapitalına çevrilməsi strateji baxışına uyğun olaraq ölkəmizdə həyata keçirilən 2022–2028-ci illər üçün Dövlət Proqramının uğurları, Dövlət Neft Fondu (ARDNF) tərəfindən 100% maliyyələşdirilən təhsil modeli, Dövlət Proqramı çərçivəsində təhsilə qoyulan sərmayənin iqtisadiyyatımıza birbaşa təsiri və ikili diplom proqramları haqqında geniş məlumat verib. Q.Xəlilov Mərkəzi Asiya və Cənubi Qafqaz regionunda təhsil təqaüdü operatorları arasında kadr mobilliyini və tədqiqat imkanlarını gücləndirəcək "Regional Talent Network" (Vahid Kadr Şəbəkəsi) təşəbbüsünü iştirakçıların diqqətinə çatdırıb.
Bundan başqa səfər çərçivəsində DPİQ-in rəhbəri “El-yurt umidi” Fondunun icraçı direktoru Qulnoza İsmayılova ilə ikitərəfli görüş keçirib. Görüşdə hər iki ölkənin insan kapitalının inkişafı sahəsindəki dövlət proqramlarının idarəetmə komandaları arasında təcrübə mübadiləsi, birgə monitorinq mexanizmlərinin təkmilləşdirilməsi və gələcək əməkdaşlıq perspektivləri müzakirə olunub. Q.Xəlilov həmçinin səfər çərçivəsində Fondun Daşkənddəki mərkəzi ofisini ziyarət edib, fondun rəhbərliyi və mütəxəssisləri ilə səmərəli işgüzar danışıqlar aparıb.