Noyabrın 3-dən etibarən Meksika məktəblərində sinif otaqlarında mobil telefonlardan istifadə qadağan ediləcək. Bu qərar federal hökumətin uşaqlar və yeniyetmələr arasında elektron cihazlardan istifadənin məhdudlaşdırılmasına yönəlmiş təşəbbüsünün bir hissəsidir. Son on ildə dünyanın yüzdən çox ölkəsində də oxşar tədbirlər həyata keçirilib.
“Tehsil365” “Ap.News” a istinadən xəbər veeir ki, təşəbbüs Meksika Prezidenti Klaudiya Şeynbaum tərəfindən irəli sürülüb. Mütəxəssislər hesab edirlər ki, bu addım gənclərin texnologiyadan həddindən artıq istifadəsini azaltmağa, diqqət dağınıqlığının, stress və narahatlığın qarşısını almağa kömək edə bilər.
Meksika hökuməti həmçinin bu ay ərzində yeni qaydalar tətbiq etməyə hazırlaşır. Həmin qaydalara əsasən, rəqəmsal platformalar nifrət nitqi, zorakılıq, seksual zorakılıq, təqib, kibertəzyiq və digər qanunsuz məzmunu əks etdirən paylaşımları silməyə məcbur olacaq.
Lakin noyabrın 3-dən qüvvəyə minəcək mobil telefon qadağası ölkənin bəzi bölgələrində etirazla qarşılanır. Bəzi valideynlər davam edən zorakılıq hadisələri fonunda övladları ilə əlaqə saxlaya bilməyəcəklərindən narahat olduqlarını bildirirlər. Bu zorakılıq hallarından uşaq və yeniyetmələr də kənarda qalmırlar.
Meksikada Uşaqların Hüquqları Şəbəkəsinin (REDIM) məlumatına görə, bu ilin ilk altı ayında 0–17 yaş arasında olan hər 10 uşaqdan biri mütəşəkkil cinayətkarlıqla əlaqəli cinayətlərin qurbanı olub.