2026-2027-ci tədris ilindən etibarən Türkiyədəki orta məktəblərin 5, 6 və 7-ci sinifləri, liseylərin isə 9, 10 və 11-ci sinifləri üçün bir sıra fənlərdən yazılı imtahanlar rəqəmsal sistem vasitəsilə keçiriləcək.
“Tehsil365” xəbər verir ki, Türkiyə Milli Təhsil Nazirliyi imtahanların hazırlanması, idarə olunması və qiymətləndirilməsini əhatə edən Ortaq Yazılı İmtahan Sisteminin tətbiqi ilə bağlı 24 sualdan ibarət təlimat nəşr edib.
Yeni sistem türk dili, riyaziyyat, elm, tarix, coğrafiya, fizika, kimya, biologiya, fəlsəfə, ingilis dili və digər təyin olunmuş fənləri əhatə edəcək.
Nazirlik bildirib ki, imtahanların məzmunu birbaşa mərkəzi orqan tərəfindən hazırlanmayacaq və müəllimlər prosesdə əsas rol oynayacaqlar. Bunu dəstəkləmək üçün müəllimlərə bacarıqlara əsaslanan açıq suallar bankı təqdim olunacaq.
Hər imtahanda orta hesabla 6-8 açıq sual olacaq. Müəllimlər qiymətləndirmə meyarları ilə yanaşı, seçilmiş mövzular üzrə iki sual hazırlayacaq və sual bankından götürülmüş iki sualı dəyişdirə biləcəklər. Sualların çətinlik səviyyəsi və balları şagirdlərin bilik səviyyəsinə əsasən müəyyən ediləcək. Buna uyğun olaraq, bütün məktəblərdə eyni sualların və eyni çətinlik səviyyəsindən istifadə nəzərdə tutulmur.
Sistem bəzi məktəblərə və siniflərə şamil edilməyəcək. İstisnalara axşam orta məktəbləri, peşə təhsili mərkəzləri, müəyyən növ xüsusi təhsil müəssisələri və hazırlıq sinifləri daxildir. İstisnalar ayrı-ayrı fənlər və siniflər üçün də müəyyən edilmişdir.
İnteqrasiya olunmuş (inklüziv) təhsil alan şagirdlər üçün imtahanlar müvafiq qaydalara uyğun keçiriləcək və nəticələr elektron məktəb sisteminə daxil ediləcək.