Saç tökülməsi həm qadınlarda, həm də kişilərdə müxtəlif səbəblərdən meydana gələn problemlərdən biridir. Genetik faktorlar, dəmir çatışmazlığı, hormonal pozuntular və vitamin əskiklikləri saç tökülməsinə təsir göstərən əsas amillər sırasındadır. Son dövrlərdə sosial şəbəkələrdə saç tökülməsinə qarşı müxtəlif maska və yağların təbliği də bu mövzuya marağı artırıb. Bəs saç tökülməsinin əsas səbəbləri hansılardır və bu problemin qarşısını almaq üçün hansı üsullara üstünlük verilməlidir?
Bu fikirləri “Tehsil365”ə müsahibəsində trixoloq Cəmilə Əsgərova bildirib.
– Cəmilə xanım, saç tökülməsinin əsas səbəbləri hansılardır və nə zaman ciddi problem hesab olunur?
“Hazırda kişilərdə saç tökülməsinin əsas səbəblərindən biri androgenetik, yəni genetik saç tökülməsidir. Qadınlarda isə saç tökülməsi həm telogen, yəni daxili səbəblərlə əlaqəli, həm də genetik faktorlarla bağlı ola bilər. Qadınlarda daha çox dəmir çatışmazlığı və hormonal problemlərlə qarşılaşırıq.
Saç tökülməsi uzun müddət davam edirsə, ilk növbədə dəmir səviyyəsi yoxlanılmalıdır. Uzun müddət gizli şəkildə davam edən dəmir çatışmazlığı təkcə saç tökülməsinə deyil, digər sağlamlıq problemlərinə də səbəb ola bilər. Buna görə də qadınlarda saç tökülməsinə xüsusi və daha ciddi yanaşırıq”.
– Sosial şəbəkələrdə yayılan saç maskaları və yağlar həqiqətən faydalıdırmı?
“Saç maskaları və yağlar faydalı ola bilər. Lakin bunun üçün ilk növbədə saç tökülməsinə səbəb olan daxili problemlər aradan qaldırılmalıdır. Həmin vasitələr müalicəyə əlavə olaraq istifadə edilə bilər. Burada əsas məqam məhsulun tərkibidir. İstifadə olunan vasitənin üzərində tərkibi açıq şəkildə göstərilməli və onun hansı növ saç tökülməsində faydalı olduğu bilinməlidir”.
– Saç tökülməsinin qarşısını almaq üçün vitamin qəbul etmək nə dərəcədə doğrudur?
“Əgər saç tökülməsi genetik səbəblərlə bağlıdırsa, vitamin qəbulunun müalicə baxımından effektivliyi məhduddur. Göstəriş olduğu halda dəstək məqsədilə sink, D vitamini və selen istifadə edilə bilər. Qadınlarda saç tökülməsi B12 və D vitamini çatışmazlığı kimi daxili səbəblərdən qaynaqlanırsa, həmin çatışmazlıqların aradan qaldırılması, əlbəttə ki, faydalı olacaq”.
– Saç əkimi hansı hallarda zəruridir? Saçları təbii yollarla bərpa etmək mümkündürmü?
“Saç əkiminə ehtiyac olub-olmadığını saç tökülməsinin dərəcəsinə əsasən müəyyən edirik. Əgər saç tökülməsi birinci və ya ikinci dərəcədədirsə, ilk növbədə müalicəyə şərait yaradır və müəyyən müddət nəticəni müşahidə edirik. Əgər saç tökülməsini artıq nəzarətdə saxlamaq mümkün olmursa, bu zaman saç əkimi ilə problemin həlli daha məqsədəuyğun hesab edilə bilər.
Tarixən insanlar saç tökülməsini təbii üsullarla aradan qaldırmağa və saçları bərpa etməyə çalışıblar. Lakin bu üsullar günümüzədək öz aktuallığını qoruyub saxlamayıb”.