Azərbaycan universitetlərinin tələbələri beynəlxalq elmi platformalarda tədqiqatlarını təqdim etməklə ölkəmizi akademik müstəvidə təmsil edirlər. Bu istiqamətdə Azərbaycan Dövlət Neft və Sənaye Universitetinin tələbələri də bir sıra beynəlxalq konfranslarda iştirak ediblər.
“Tehsil365” AzEdu.az-a istinadən xəbər verir ki, oktyabrın 30-da ADNSU-nun Kimya texnologiyaları fakültəsinin “Biotexnologiya və qida mühəndisliyi” kafedrasının magistrant və tələbələri Özbəkistan və Türkiyədə keçirilən beynəlxalq elmi konfranslara onlayn qoşularaq araşdırmalarını təqdim ediblər.
Biotexnologiya ixtisası üzrə I kurs magistrantları Fidan Kərimli, Ofelya İsmayılova və Xumar Nəsirova “Fundamental və tətbiqi mikrobiologiyanın müasir vəziyyəti və inkişaf perspektivləri: gənc alimlərin baxışı” mövzusunda keçirilən konfransda şifahi məruzə ilə çıxış ediblər.
Dosent Nərgiz Sultanovanın elmi rəhbərliyi ilə hazırlanan “Termofil bakteriyaların lipazaları: xüsusiyyətləri, qida və sənaye biotexnologiyasında tətbiq perspektivləri” adlı tədqiqat konfrans materiallarında dərc olunub.
Bundan başqa, universitetin Qida mühəndisliyi ixtisası üzrə tələbələri Xədicə Abbasova, Ayxan Namazov, Firuzə Rzayeva, Xədicə Musazadə, Məleykə Əliyeva və Kənan Allazov oktyabrın 24-də Türkiyənin Ankara şəhərində keçirilən III Beynəlxalq Mühəndislik və Elmlər Konqresində iştirak ediblər.
24 ölkədən alimlərin qatıldığı tədbirdə tələbələr öz elmi araşdırmalarının nəticələrini təqdim ediblər.
Hər iki konfransda iştirak edən tələbə və magistrantlar sertifikatlarla təltif olunublar.